پی پی پی چیئرمین بلاول بھٹو زرداری نے کہا ہے کہ پیپلزپارٹی محروم طبقات، کسانوں، مزدوروں، خواتین کی آواز بنتی رہے گی۔
چیئرمین بلاول بھٹو زرداری نے پارٹی کے 58 ویں یوم تاسیس پر پیغام دیتے ہوئے کہا کہ پیپلز پارٹی کا یوم تاسیس جمہوریت، باوقار مساوات اور سماجی انصاف کی جدوجہد سے جنم لینے والی عوامی تحریک کا جشن ہے۔
انہوں نے پیپلز پارٹی کے بانی اراکین، قائدین اور بےشمار جیالوں کو خراجِ عقیدت بھی پیش کیا اور کہا کہ پیپلز پارٹی ہمیشہ مظلوموں کے حقوق کی ڈھال بنی رہی ہے، قائدِ عوام سے شہید محترمہ بینظیر بھٹو تک پیپلز پارٹی نے تاریخی جدوجہد اور بے مثال قربانیاں دیں ہیں۔
بلاول بھٹو نے کہا کہ قائدِ عوام نے عوام کو بااختیار بنانے کے لیے آواز بلندی کی اور بی بی شہید نے جمہوریت کے لیے بے مثال جدوجہد کی، ہماری پارٹی کا سفر ہمارے شہداء کی قربانیوں سے رقم ہے اور کارکنوں کی استقامت نے اسے مضبوط بنایا۔
چیئرمین پی پی نے کہا کہ صدر آصف علی زرداری کی قیادت میں پاکستان نے بے مثال کامیابیوں کا دور دیکھا، ان کی زیر قیادت آئین کی بحالی اور تاریخی 18ویں ترمیم منظور ہوئی، انکی قیادت نے صوبائی خود مختاری اور مفاہمت و جمہوری تسلسل کے لیے اقدام کو ممکن بنایا۔
مزید پڑھیں: پاکستان پیپلز پارٹی کا 58 واں یومِ تاسیس آج
انکا کہنا تھا کہ پیپلز پارٹی غریبوں، محروم طبقات، کسانوں، مزدوروں، خواتین اور اقلیتوں کی آواز بنتی رہے گی، ہمارے نظریئے کی بنیاد عوام کی خدمت ہے، جب تک عدم مساوات، ناانصافی اور غربت موجود ہیں، پیپلز پارٹی کی جدوجہد جاری رہے گی۔
بلاول بھٹو نے کہا کہ پارٹی کے رہنماؤں اور جیالوں کو سلام پیش کرتا ہوں جن کی ثابتقدمی اور جذبے نے جمہوریت کے پرچم کو ہمیشہ سربلند رکھا، میری قوت کا سرچشمہ پاکستان کے عوام اور ہمارے کارکنوں کا ہر آزمائش میں ڈٹ کر کھڑا ہونے ولا اٹل حوصلہ ہے۔
انہوں نے کہا کہ تمام پاکستانی ایک خوشحال، پُرامن اور جمہوری پاکستان کی جدوجہد میں متحد ہو جائیں، آج یومِ تاسیس پر میں اپنے شہیدوں کے مشن کو جاری رکھنے کا عہد کرتا ہوں۔
بلاول بھٹو نے کہا کہ عہد کرتا ہوں کہ ہم ایک ایسا پاکستان بنائیں گے جہاں ہر شہری کو یکساں حقوق، برابر کے مواقع میسر ہوں، عہد کرتا ہوں ہم ایک ایسا پاکستان تعمیر کریں گے جہاں تمام شہریوں کو خوف نہیں بلکہ امید سے جڑی ہوئی ایک روشن منزل میسر ہو۔
چیئرمین پیپلزپارٹی نے مزید کہا کہ آئیے! ہم سب مِل کر قربانی، جراَت اور عوامی طاقت کی اس میراث کو آگے بڑھائیں، ہمارا سفر جاری ہے۔