صدرِ مملکت آصف علی زرداری سے مصر کے وزیرِ خارجہ ڈاکٹر بدر احمد محمد عبدالعاطی نے ایوانِ صدر میں ملاقات کی، جس میں دو طرفہ تعلقات، علاقائی صورتحال اور اقتصادی تعاون سمیت اہم امور پر تبادلہ خیال ہوا۔
مصری وزیرِ خارجہ نے اس موقع پر مصری صدر عبدالفتاح السیسی کا خصوصی پیغام بھی صدر پاکستان کو پہنچایا۔
صدر آصف علی زرداری نے پاکستان اور مصر کے 77 سالہ دیرینہ برادرانہ تعلقات کو مزید مضبوط بنانے کے عزم کا اعادہ کرتے ہوئے کہا کہ دونوں ممالک کو چاہیے کہ اس طویل سفارتی رشتے کو وسیع تر اقتصادی شراکت داری میں تبدیل کریں۔
انہوں نے تجارت، سرمایہ کاری، توانائی، تعمیرات، زراعت، کان کنی اور آئی ٹی سمیت مختلف شعبوں میں باہمی تعاون بڑھانے کی اہمیت پر زور دیا۔
صدر مملکت کا کہنا تھا کہ پاکستان خطے میں امن، استحکام اور اقتصادی ترقی کا خواہاں ہے، اور مصر کے ساتھ قریبی تعاون دونوں ملکوں کے عوام کے مفاد میں ہے۔
انہوں نے اس توقع کا اظہار کیا کہ پاکستان–مصر تعلقات مستقبل میں مزید مضبوط ہوں گے اور دونوں ممالک مشترکہ منصوبوں کے ذریعے آگے بڑھیں گے۔
ملاقات کے دوران خطے کی مجموعی صورتحال پر بھی تفصیلی بات چیت ہوئی، جس میں سیاسی اور سفارتی چیلنجز پر تبادلہ خیال کیا گیا۔
بعد ازاں صدر پاکستان اور مصری وزیرِ خارجہ کے درمیان ون آن ون ملاقات بھی ہوئی، جس میں دو طرفہ تعلقات کو نئی جہت دینے پر اتفاق کیا گیا۔