انٹرنیشنل کرکٹ کونسل (آئی سی سی) نے ٹی20 ورلڈ کپ 2026 کے ٹکٹوں کی فروخت کا باضابطہ آغاز کر دیا ہے، تاہم سوشل میڈیا پر جاری کیے گئے پروموشنل پوسٹر نے پاکستان میں نیا تنازع چھیڑ دیا ہے۔
آئی سی سی کے جاری کردہ پوسٹر میں بھارت، سری لنکا، جنوبی افریقہ، انگلینڈ اور آسٹریلیا کے ٹی20 کپتانوں کی تصاویر شامل ہیں، مگر پاکستانی کپتان سلمان علی آغا کی تصویر نمایاں طور پر غائب ہے۔
اس غیرمتوقع اقدام پر پاکستانی کرکٹ مداحوں نے شدید ردعمل دیتے ہوئے آئی سی سی کے رویے کو غیر مناسب اور متعصبانہ قرار دیا۔
شائقین نے سوشل میڈیا پر آئی سی سی پر تنقید کی بوچھاڑ کر دی یہ کہتے ہوئے کہ ورلڈکپ جیسے بڑے ایونٹ کے تشہیری مواد میں پاکستان جیسے اہم کرکٹ ملک کے کپتان کو نظر انداز کرنا ناقابلِ فہم ہے۔
خیال رہے کہ ٹی20 ورلڈکپ 2026 آئندہ سال فروری اور مارچ میں بھارت اور سری لنکا میں شیڈول ہے، جبکہ دنیا بھر کے شائقین کے لیے آج سے ٹکٹوں کی آن لائن خریداری کا آغاز ہو چکا ہے۔
پاکستانی کرکٹ حلقوں کا کہنا ہے کہ آئی سی سی کو مہم میں شامل ممالک کی نمائندگی منصفانہ طریقے سے کرنی چاہیے تاکہ کسی بھی ملک کے شائقین میں احساسِ محرومی پیدا نہ ہو۔