مریخ پرموجود کاربن کے ذخائر، جن کو ناسا کے کیوریوسٹی روور نے دریافت کیا تھا، کی ممکنہ طور پر تین وجوہات ہو سکتی ہیں، جن میں سے ایک قدیم حیاتیاتی زندگی بھی ایک وجہ ہو سکتی ہے۔

یہ نتیجہ امریکی ریاست پینسِلوینیا کے ماہرین نے اخذ کیا ہے جن کا کہنا تھا کہ اس کاربن کی وجہ خلائی دھول یا کاربن ڈائی آکسائیڈ کا الٹرا وائلٹ بریک ڈاؤن ہونا بھی ہو سکتی ہے۔

بیکٹیریل تھیوری کے مطابق زیر زمین رہنے والے مائیکرو حیاتیات جو میتھین پیدا کرتے ہیں، وہ سطح پر پہنچ کر الٹرا وائلٹ شعاؤں سے ٹوٹ جاتی ہے۔

محققین کی جانب سے بتائی گئی تینوں صورتیں غیر روایتی ہیں کیوں کہ عمومی طور پر زمین پر ایسے عمل نہیں ہوتے۔

کیوریوسٹی 6 اگست 2012 کو مریخ کی سطح پر اترا تھا اور تب سے وہ گیل گڑھے میں گھوم رہا ہے اور چٹانوں کے نمونے جمع کر رہا ہے اور ان کا تجزیہ کر رہا ہے اور ڈیٹا زمین پر بھیج رہا ہے۔

مریخ پر آدھی درجن جگہوں پر قدیم ذخائر سے کاربن ملا ہے۔

کاربن کے دو مستحکم آئسوٹوپس ہوتے ہیں – C¹² اور C¹³۔

مقالے کے مصنف اور پینسِلوینیا اسٹیٹ یونیورسٹی کے ماہرِ ارضیات کرسٹوفر ہاؤس کا کہنا تھا کہ ہمارے نظامِ شمسی میں C¹² اور C¹³ کی مقدار اتنی ہے جتنی اس کی تشکیل پاتے وقت تھی۔

انہوں نے مزید کہا کہ دونوں آئسوٹوپس ہر چیز میں ہوتے ہیں لیکن کیوں کہ کاربن-12، کاربن-13 کی نسبت زیادہ تیزی سے رد عمل دِکھاتا ہے، نمونوں میں دونوں کی مقدار کو دیکھنے سے کاربن سائیکل کا ظاہر ہو سکتا ہے۔