ماہرینِ آثارِ قدیمہ نے انکشاف کیا ہے کہ لندن میں شارڈ کے قریب ایک زبردست رومی موزائک دریافت ہوا ہے جس میں رنگ برنگے پھول اور جیومیٹرک اشکال بنی ہوئی ہیں۔

ماہرین کے مطابق لندن میں دریافت ہونے والا یہ موزائک جو اپنی قسم کا سب سے بڑا ہے، کسی دور میں رومیوں کے کھانے کے کمرے کا فرش تھا۔

 وہ ڈٓائیننگ روم ممکنہ طور پر رومی ’مینسیو‘ کا حصہ ہوں گے۔ میونسیو وہ موٹیل ہوتے ہیں جن میں برطانیہ آنے یا یہاں سے جانے والے ریاستی ملازمین اور حکام کے لیے رہائیش، ان کے جانوروں کے لیے اصطبل اور کھانے کی سہولیات موجود ہوتی تھیں۔

یہ مینسیو رومی لونڈینیم کے سرحدوں پر موجود تھے۔ یہ علاقہ دریائے ٹیمز کے شمالی کنارے پر قائم تھا۔

میوزیم آف لندن آرکیولوجی کے ماہرینِ آثارِ قدیمہ کو یہ نایاب دریافت نئی کلچرل کوارٹر کی تعمیر کے لیے کی جانے والی کھدائی کے دوران ہوئی۔

اگرچہ اس جگہ کو عوام کے لیے بند کیا ہوا ہے لیکن ماہرین نے اس موزائک کا تفصیلی تھری ڈی ماڈل بنایا ہے۔

میوزیم کی سائٹ سپروائزر اینٹونیٹا لرز کا کہنا تھا کہ یہ زندگی میں ایکبار ہونے والی دریافت ہے۔ ایسی جگہ پر کام کرنا کافی خوش گوار ہے جہاں رومی آثار قدیمہ بڑی حد تک سالم ہیں اور ان کو بعد کی سرگرمیوں سے کوئی نقصان نہیں پنہچا ہے۔