آپ نے اکثر دیکھا ہوگا کہ جب چھپکلی پر کوئی حملہ ہوتا ہے تو اس کی دم اتر جاتی ہے، ایسا شکاری کے حملے کی وجہ سے نہیں ہوتا، بلکہ چھپکلی خود اپنی دم جسم سے الگ کرتی ہے، اس کا مقصد شکاری کو چکما دینا ہوتا ہے۔

شکاری دم کی طرف متوجہ ہوجاتا ہے اور چھپکلی کو بچنے کا راستہ مل جاتا ہے۔

چھپکلی سمیت اور بھی جانور ایسے ہیں جو شکاری اور خطرے سے بچنے کے لیے اپنے جسم کے اعضاء کو جسم سے الگ کر دیتے ہیں، سائنسی زبان میں اس عمل کو ایٹونومی کہا جاتا ہے، اور دم کے الگ ہونے کو خاص طور پر کیڈول ایٹونومی کہا جاتا ہے۔

دم علیحدہ کیسے ہوتی ہے؟

 چھپکلیوں میں دم علحیدہ کرنے کے دو طریقے پائے جاتے ہیں۔

ایک طریقے میں دم میں موجود ریڈھ کی ہڈی کے مہورں  (vertebrae) کے درمیان سے دم ٹوٹ جاتی ہے یعنی دو ورٹیبریز کے درمیان میں موجود حصہ الگ ہوجاتا ہے۔ یہ حصہ، قدرے کمزور ہوتا ہے جو ہلکا سا زور لگانے سے الگ ہوجاتا ہے، اس طریقے کو ہم انٹرورٹبلر ایٹونومی کہتے ہیں۔

دوسرا اور زیادہ عام طریقے میںورٹبرے  یعنی کے ہڈی پر ایک کمزور حصہ ہوتا ہے جسے fracture planes کہا جاتا ہے۔

جب چھپکلی نے اپنی دم الگ کرنی ہوتی ہے تو وہ اپنی دم کے مسلز کی مدد سے ان facture planes پر زور ڈالتی ہے جس سے دم ٹوٹ کر الگ ہوجاتی ہے۔

جہاں سے دم ٹوٹتی ہے وہاں خاص قسم کے sphincter مسلز موجود ہوتے ہیں جو خون کو باہر نہیں آنے دیتے، اس کے علاوہ ٹوٹی ہوئی جلد کے حصے (skin flaps) جلدی جڑ جاتے ہیں تاکہ اینفیکشن سے بچا جاسکے۔

 ٹوٹی ہوئی دم ہلتی کیوں ہے؟

دم میں موجود نیورنز ٹوٹنے کے کچھ دیر بعد بھی دم کے مسلز کو nerve impulse دیتے رہتے ہیں، جس کی وجہ سے ٹوٹی ہوئی دم بھی ہلتی رہتی ہے، اور تقریباً آدھے گھنٹے تک ہلتی رہ سکتی ہے۔

مارنے والا دم کی طرف کیوں جاتا ہے؟

دم کافی تیزی سے ہل رہی ہوتی ہے، اس کے علاوہ دم کا رنگ بھی کشش رکھتا ہے۔

ٹوٹی دم کے نقصانات اور کیا دم دوبارہ آتی ہے؟

دم کے بغیر چھپکلی دوسری چھپکلیوں کی نسبت کمزور ہوجاتی ہے، دم نہ صرف ایک دوسرے کے ساتھ لڑنے کے لیے استعمال کی جاتی ہے، بلکہ دم خوراک کی اسٹوریج بھی کرتی ہے۔

اس کے علاوہ دم کے بغیر چھپکلی کو نسل چلانے کے مواقع بھی کم ملتے ہیں۔

زیادہ تر چھپکلیاں اپنی نئی دم واپس اگا لیتی ہیں جبکہ کچھ چھپکلیاں اور کچھ اور جانور ایٹونومی کے بعد پھر سے اپنے جسم کا وہ حصہ واپس حاصل نہیں کرسکتے۔

دوبارہ سے دم اگانے کے لیے کافی توانائی چاہیے جس کے لیے ان چھپکلیوں کو زیادہ شکار کرنا پڑتا ہے اور ساتھ ہی توانائی بچانے کے لیے حرکت بھی کم کرنی پڑتی ہے۔

نئی دم ، پہلی کے مقابلے میں چھوٹی اور ہلکے رنگ کی ہوتی ہے، اور اس میں کوئی ہڈی نہیں ہوتی، بلکہ یہ  کرٹیلیج سے بنی ہوئی ہوتی ہے جس سے ہمارا ناک اور کان بنے ہوئے ہیں۔

نئی دم کے اگنے میں کچھ ہفتوں سے کئی مہینے بھی لگ سکتے ہیں۔