چین میں ایک فارم پر کم از کم 12 دنوں سے سینکڑوں بھیڑیں مسلسل دائرے میں گھوم رہی ہیں، انٹرنیٹ پر اس ’پراسرار بھیڑ چال‘ کی ویڈیو نے لوگوں کو حیرت زدہ کر دیا ہے۔

دنیا بھر کی میڈیا کی توجہ حاصل کرنے والی اس خبر اور ویڈیو نے ’بھیڑ چال‘ کی ایک اور سطح منکشف کر دی ہے، لوگ ابھی تک حیران ہیں کہ شمالی چین کے شہر منگولیا میں بھیڑوں کا یہ ریوڑ آخر کیوں دو ہفتوں سے ایک دائرے میں گھوم رہا ہے۔

چین کی سرکاری نیوز سائٹ پیپلز ڈیلی نے 10 دن کے بعد اس عجیب و غریب واقعے کی سیکیورٹی فوٹیج ٹویٹ کی ہے، اسے ’بھیڑوں کا بڑا اسرار‘ قرار دیا جا رہا ہے، رپورٹ میں واضح طور پر کہا گیا ہے کہ یہ بھیڑیں صحت مند ہیں، اور انھیں کوئی بیماری نہیں ہے، اور اسی وجہ سے بھیڑوں کے اس ’عجیب رویے‘ کی وجہ اب بھی ایک معمہ ہے۔

ویڈیو کلپ میں دیکھا جا سکتا ہے کہ سینکڑوں بھیڑیں ایک ساتھ ایک فارم میں ایک جگہ کا چکر لگا رہی ہیں، جب کہ ان کے اردگرد موجود دیگر بھیڑیں بے پروا دکھائی دے رہی ہیں۔

بھیڑوں کی مالکن میاؤ کا دعویٰ ہے کہ شروع میں چند بھیڑوں نے دائرے میں گھومنا شروع کیا تھا، پھر دھیرے دھیرے ریوڑ کی دیگر بھیڑیں بھی اس کے ساتھ ’چال‘ میں شامل ہوتی گئیں۔

انھوں نے بتایا کہ ان کے پاس بھیڑوں کے 34 احاطے ہیں، لیکن صرف 13 ویں احاطے کی بھیڑوں نے یہ عجیب رویہ دکھایا۔

ماہرین کا کہنا ہے کہ اس عجیب و غریب رویے کی ایک وجہ ایک بیکٹیریائی بیماری ’لسٹریوسِس‘ (listeriosis) ہو سکتی ہے، اس کی وجہ سے جانور ایک دائرے میں گھومنے لگ جاتے ہیں، کیوں کہ اس بیکٹیریا کی وجہ سے دماغ کی ایک طرف مفلوج ہو جاتی ہے۔

تاہم ماہرین کا کہنا ہے کہ اگر بھیڑوں کو یہ انفیکشن لاحق ہو جائے تو وہ علامات ظاہر ہونے کے بعد 24 سے 48 گھنٹوں کے اندر مر جاتی ہیں۔