یورپ میں ایک ایسا جزیرہ موجود ہے جو ہزاروں جزیروں میں منفرد حیثیت رکھتا ہے۔

فیزنٹ آئی لینڈ نامی ایک چھوٹا سا جزیرہ ہے جو فرانس اور اسپین کی سرحد پر واقع ہے۔

اس چھوٹے سے جزیرے کا رقبہ 6820 مربع میٹر ہے اور اس پر کوئی رہتا بھی نہیں ہے کیونکہ جزیرے پر سوائے ہریالی کے کوئی دوسری سہولت موجود نہیں ہے۔

دنیا میں ایسے کئی جزیرے یا علاقے ہوں گے جو دو ممالک کی سرحدوں پر واقع ہوتے ہیں اور ان میں سے کئی متنازع بھی ہوں گے لیکن اس جزیرے پر دو ممالک کی ملکیت کا کوئی تنازع نہیں بلکہ فرانس اور اسپین دونوں ہی اس کے مالک ہیں اور ہر چھ ماہ بعد ملکیت کو دوسرے کے حق میں بدل دیا جاتا ہے۔

تاریخی طور پر یہ جزیرہ اسپین کی ملکیت میں تھا، تاہم 17 ویں صدی عیسوی میں فرانس اور اسپین کی 30 سالہ جنگ کے بعد اس جزیرے کی ملکیت کا معاملہ پیش آیا تو دونوں طرف کی حکومتوں اور افواج نے اس کی ملکیت پر مذاکرات شروع کیے۔

گیارہ برس میں کل 24 اجلاس ہوئے اور ایک معاہدہ ہوا کہ یہ جزیرہ دونوں ملکوں کی ملکیت میں شامل رہے گا۔

یہ محبت فرانس کے بادشاہ لوئی XIV نے اسپین کے بادشاہ فلپ چہارم کی بیٹی ماریہ تھریسا کی شادی سے خوشگوار انجام پذیر ہوئی۔

شادی کی یاد میں اس جزیرے پر ایک یادگار تعمیر کی گئی اور اسے امن کی علامت قرار دیا گیا اور اس کے بعد یہ تاریخی فیصلہ ہوا کہ جزیرہ 6 ماہ فرانس اور 6 ماہ اسپین کی ملکیت رہے گا اور دونوں ممالک کی بحریہ یہاں کی نگرانی بھی کرتی ہے۔

اس منفرد جزیرے پر عام شائقین صرف خاص مواقع پر ہی آسکتے ہیں جبکہ سال کے وسط کی تقریب سب سے اہم ہے جس میں فرانس اور اسپین دونوں ممالک کے سیاح شریک ہوتے ہیں۔