انگلینڈ کے ایک گاؤں میں مقامی افراد کو عجیب و غریب آوازیں سنائی دے رہی ہیں جس کی وجہ سے لوگ پریشان ہوگئے ہیں۔

غیر ملکی میڈیا کے مطابق انگلینڈ میں ویسٹ یارکشائر کے قریب ہیلی فیکس کے علاقے ہوم فیلڈ کے گاؤں میں ایک عجیب اور پراسرار آواز لوگوں کو سنائی دے رہی ہے۔

مقامی لوگوں نے بتایا کہ شہد کی مکھی کی بھنبھناہٹ جیسی یہ آواز ہوتی تو دھیمی ہے لیکن مسلسل اس آواز سے بعض اوقات بڑی پریشانی ہوتی ہے۔

لوگوں کا کہنا ہے کہ اب تک اس کی وجہ معلوم نہیں ہوسکی ، یہ آواز بہت تیز نہیں ہوتی لیکن اس سے ان کی نیند اور موڈ خراب ہوجاتا ہے۔

کہا یہ جا رہا ہے کہ یہ آواز تمام مقامی لوگ تو نہیں سن سکے ہیں لیکن جنہوں نے اسے سنی ہے ان کے مطابق اس سے ان کی زندگی بُری طرح متاثر ہوئی ہے۔

اس آواز سے متعلق شہ سرخیاں گزشتہ سالوں کے دوران اخبارات میں لگ چکی ہیں لیکن اب تک یہ پتہ نہیں چلا کہ یہ آواز کہاں سے آتی ہے۔

مقامی حکام نے اس حوالے سے تحقیقات کیں اور اس مقصد کے لیے ایک آزاد کنسلٹنٹ کا تقرر بھی کیا لیکن یہ پراسراریت ختم نہیں ہوئی اور اس کے بارے میں کچھ پتہ نہیں چل سکا ہے۔