جیورگاٹ لوبپول (Georgette Lepaulle) بیلجیم کی معمر خاتون ہیں، جب ان کی عمر 90 برس سے تجاوز کر گئی، یعنی یہ اولاد کی مکمل محتاج ہوئیں تو بچوں نے فیصلہ کیا کہ بوڑھی سے جان چھڑانی چاہئے۔

ایک دن طے ہوا کہ اگلے روز اسے (اولڈ ہاؤس) کے حوالے کر دیا جائے گا۔

جیورگاٹ کے پڑوس میں ایک مراکشی خاندان مقیم ہے، 40 سال سے اس مسلم فیملی کے ساتھ ان کے تعلقات تھے۔ مراکشی نژاد السید محمد مداح خود بھی مسلم روایات کے امین ہیں اور ان کا گھرانہ بھی، خصوصاً ماں باپ کی عزت و توقیر کے حوالے سے۔

محمد مداح کی والدہ بھی بوڑھی اور جیورگاٹ لوبپول کی ہم عمر ہیں۔

جب اسے پتہ چلا کہ پڑوسی اپنی ماں سے جان چھڑانے والے ہیں تو اس نے ان سے کہا کہ یہ بزرگ تمہارے لیے بوجھ ہے تو میرے حوالے کردو، میری ماں کے ساتھ رہے گی اور میں اپنی ماں کی طرح اس کا خیال رکھوں گا۔ یہ کہہ کر وہ جیورگاٹ لوبپول کو اپنے گھر لے آیا۔

خاتون نے یہاں آکر جو ماحول دیکھا تو اس کی حیرت کا کوئی ٹھکانہ نہ رہا، سارے اہل خانہ محمد مداح کی ماں کیلئے پلکیں بچھانے کو تیارہیں کوئی باہر سے آتا ہے تو پہلے اسے سلام کرکے ہاتھوں کا بوسہ لینا ضروری سمجھتا ہے یہ بوڑھی اماں اس گھر کی ملکہ ہے۔

اسی طرح کے احترام کا سلوک اس بزرگ خاتون سے بھی کیا جانے لگا، اس نے سوچا کہ شاید یہ دو تین دن کی کہانی ہے پھر یہ بھی میرے بچوں کی طرح کریں گے مگر نہیں، اس کا خدشہ غلط ثابت ہوا کئی دن گزرنے کے بعد بھی اس کی خدمت و عزت میں کوئی کمی نہیں آئی تو اس نے کہا کہ یہ کیسا خوبصورت دین ہے، یہ تو سراسر رحمت ہے مجھے بھی اس دین میں داخل کردو۔

چنانچہ 91 برس کی اس خاتون نے بھی کلمہ پڑھ لیا اور نور اسلام سے منور ہو گئیں۔

اب یہ جیورگاٹ لوبپول نہیں، نور کہلاتی ہیں۔

یہ اس وقت اسلام قبول کرنے والی دنیا کی سب سے معمر خاتون ہیں اور مراکشی خاندان کے ساتھ ہی ان کے گھر میں مقیم ہیں۔