ٹی بیگ، چائے کی پتی کی وہ چھوٹی سے تھیلی ہوتی ہے جس کا استعمال کرتے ہوئے کبھی بھی کہیں بھی چائے بنائی جاسکتی ہے۔

اس کو استعمال کرنے کے لئے صرف گرم پانی درکار ہوتا ہے اور بس پھر حسب ضرورت چینی اور دودھ ڈال کر چائے کا مزہ لیا جاسکتا ہے۔

ان ٹی بیگس میں وہی پتی ہوتی ہے جو ہم عام طور پر گھروں میں استعمال کرتے ہیں جبکہ گرین ٹی بھی زیادہ تر انہی بیگ میں دستیاب ہوتی ہیں۔

لیکن کیا آپ جانتے ہیں کہ ان ٹی بیگ کو چائے بنانے کے بعد بھی اپنے کچھ مقاصد حاصل کئے جاسکتے ہیں۔

اس حوالے سے عموماً لوگ نہیں جانتے لیکن یہ معلومات آپ کے لئے کافی فائدے مند ثابت ہوسکتی ہے۔

سلاد میں شامل کریں

چائے کی استعمال شدہ پتی سلاد کا مزہ دوبالا کر دیتی ہے۔

چائے کی استعمال شدہ پتی کی صرف ایک چٹکی سلاد پر چھڑک کر استعمال کریں۔

یہ بھی پڑھیں: استعمال شدہ ٹی بیگ میں چھپا ہے کئی مسائل کا حل

اچار کے طور پر استعمال کریں

چائے کی استعمال شدہ پتی اچار کے لیے بہترین اجزا ہے۔

اسے تیل، لیموں کا رس اور نمک میں ملا کر ایک جار میں ڈال کر ایک ہفتہ تک چھوڑ دیں پھر اسے اچار کی طرح استعمال کریں یا چاہیں تو سینڈوچ، سلاد اور دیگر کھانوں میں شامل کریں۔

باورچی خانے کی سطحوں کو صاف کریں

کچن کے سلیب یا کٹنگ بورڈز کی صفائی کرنی ہو تو چائے کی پتی استعمال کریں۔

گیلی استعمال شدہ چائے کی پتیاں سلیب یا کٹنگ بورڈ پر ڈال دیں پھر اسے ہلکے ہاتھوں سے رگڑیں، پھر اسے معمول کے مطابق صاف کریں۔

چائے کی پتی گندگی، چکنائی اور بدبو کو دور کر دیتی ہے، اسے آپ برتن دھونے میں بھی استعمال کر سکتے ہیں۔

فریج کی صفائی کریں

اگر آپ کے فریج سے مسلسل کھانوں کی بو آتی ہو تو چائے کی استعمال شدہ پتی کو پھینکنے کے بجائے فریج میں رکھ دیں، یہ بدبو جذب کرنے کی صلاحیت رکھتی ہے۔

یہ بھی پڑھیں: کیا آپ کا جسم بھی ہر وقت ٹھنڈا رہتا ہے تو جانئے اس کی سائنسی وجہ

اس کے علاوہ اسے مائیکرو ویو اور اوون کو صاف کرنے کے لیے بھی استعمال کیا جاسکتا ہے، ٹی بیگ کو استعمال کے فوراً بعد اوون میں رکھ دیں، جب تک یہ گرم ہوگا یہ تمام بدبو کو جذب کر لے گا۔