میکسیکو سے ایک عجیب و غریب واقعہ دیکھنے کو ملا ہے جہاں ایک شخص کو ہوائی جہاز کا ہنگامی دروازہ کھول کر اس کے پر پر چہل قدمی کرنے پر گرفتار کر لیا گیا ہے۔

غیر ملکی خبر رساں ادارے کی رپورٹ کے مطابق میکسیکو سٹی سے گوئٹے مالا جانے والی پرواز کو ایک غیر معمولی موڑ کا سامنا کرنا پڑا جب ایک مسافر، طویل تاخیر اور گھٹن کے حالات سے مایوس ہو کر، ہنگامی دروازہ کھول کر ونگ پر چلنے لگا تھا۔

ایرومیکسیکو کی پرواز، جو صبح 8:30 بجے روانہ ہونے والی تھی، تکنیکی مسائل کی وجہ سے تین گھنٹے کے لیے ٹرمک پر گراؤنڈ کر دی گئی۔ ایئر کنڈیشنگ یا پانی دستیاب نہ ہونے کی وجہ سے مبینہ طور پر مسافروں میں غصہ بھڑک اٹھا۔

اس صورتحال میں ایک نامعلوم مسافر نے معاملات اپنے ہاتھ میں لیتے ہوئے ہنگامی دروازہ کھولا اور ونگ پر چلنے لگا جس کے نتیجے میں کوئی جانی نقصان نہ ہونے کی اطلاعات ہیں تاہم اس شخص کو حراست میں لے لیا گیا۔

واقعے سے متعلق ایک رپورٹ میں کہا گیا ہے کہ مسافر کے اس اقدام کے بعد جہاز کی تبدیلی ضروری ہو گئی تھی لیکن یہ واضح نہیں ہوسکا کہ آیا وہ شخص ابھی بھی حراست میں ہے، یا اسے کن الزامات کا سامنا کرنا پڑ سکتا ہے۔