برطانوی ائیر لائن ‘ایزی جیٹ’ ایڈن برگ سے انطالیہ جانے والی پرواز میں سوار نشے میں دھت مسافر آپے سے باہر ہوگیا جس کی ویڈیو سوشل میڈٰیا پر وائرل ہوگئی ہے۔

حال ہی میں ایک ویڈیو سوشل میڈیا پر خوب وائرل ہورہی ہے جس میں نشے میں دھت ایک شخص کو دورانِ پرواز پولیس اور ایئر لائن کے عملے سے ہاتھا پائی کرتے ہوئے دیکھا جاسکتا ہے۔

سوشل میڈیا پر وائرل ہونے والی اس ویڈیو میں دیکھا جاسکتا ہے کہ نشے میں دھت اس مسافر نے ہوائی جہاز کی چھت پر مکے مارتے ہوئے نا صرف ساتھی مسافر کو گالیاں دیں بلکہ جارحانہ انداز میں اس پر حملہ بھی کردیا۔

اس کے بعد مشتعل مسافر اپنی سیٹ سے باہر نکل کر پہلے ایک ترک پولیس افسر اور پھر ایئر ہوسٹس کو مارتا ہوا دکھائی دیا جبکہ دیگر مسافروں نے جھگڑے کو ختم کرنے کی کوشش کی۔

طیارہ کی انتظامیہ نے پرواز کی ترکی میں ہنگامی لینڈنگ کرنے کے بعد بالاخر اس پرتشدد شخص کو قابو کرکے ہوائی جہاز سے باہر نکال دیا۔