کراچی میں تاجروں کی جانب سے بلدیاتی نظام کے خلاف ایم اے جناح روڈ پر دھرنے کا اعلان کردیا گیا ہے۔

تفصیلات کے مطابق تاجر برادری کا کہنا ہے کہ اگر حکومت کی جانب سے تین دن میں مسائل حل نہ کیئے گئے تو جمعہ 06 ستمبر 2019 سہ پہر 04 بجے عیدگاہ چوک ایم اے جناح روڈ پر دھرنا دے کر روڈ بلاک کرینگے۔

تاجر برادری کے سربراہ عتیق میر کا کہنا ہے کہ دھرنا اس وقت تک جاری رہے گا جب تک علاقے میں سیوریج اور صفائی کا کام شروع نہیں کیا جاتا جبکہ اگلے مرحلے میں شہر بھر کی متاثرہ مارکیٹوں میں احتجاج، دھرنے اور ریلیوں کا انعقاد کیا جائیگا۔

انہوں نے مزید بتایا ہے کہ فیصلہ آج آل کراچی تاجر اتحاد کے تاجروں کے ایک ہنگامی اجلاس میں کیا گیا ہے۔

آل کراچی تاجر اتحاد کے چیئرمین عتیق میر نے بتایا کہ شہر میں بدترین بلدیاتی صورتحال پر جنگل بن چکا ہے جبکہ حکومت سندھ کو تنقید کا نشانہ بناتے ہوئے انکا کہنا تھا کہ حکومت گونگی، بہری اور اندھی ہوچکی ہے اور حکومتِ سندھ سرزمینِ سندھ پر ایک بدنما داغ ہے۔

انکا مزید کہنا تھا کہ سندھ کے حکمرانوں کی بے حسی اور بدعنوانی نے عروس البلاد کراچی کو دنیا کی سب سے بڑی کچرا کنڈی بنادیا ہے۔

انھوں نے کہا کہ بارش کی تباہ کاریوں کے بعد تاجر اور شہری گذشتہ ایک ماہ سے حکومت کو مدد کیلئے پکار رہے ہیں۔