مشیر خزانہ ڈاکٹر حفیظ شیخ کی عالمی بینک کے وفد سے ملاقات ہوئی۔

ملاقات کے اعلامیہ کے مطابق عالمی بینک ملک کے محصولات میں اضافہ کے منصوبے کیلئے 40 کروڑ ڈالر فراہم کرے گا۔

اعلامیے میں کہا گیا ہے کہ منصوبہ کے تحت ایف بی آر کی استعداد کار کو بہتر بنایا جائے گا جبکہ آئندہ پانچ سال میں ملک کی ٹیکس ٹو جی ڈی پی شرح کو 17 فیصد پر لایا جائے گا۔

اعلامیہ میں مزید کہا گیا کہ ملک میں ٹیکس ادا کرنے والے افراد کی تعداد کو 12 لاکھ سے بڑھا کر 35 فیصد کیا جائے گا۔

واضح رہے اس سے قبل مشیر خزانہ ڈاکٹر عبدالحفیظ شیخ سے عالمی بینک کے جنوبی ایشیا سے متعلق نائب صدر ہارٹ ویگ شیفر نے واشنگٹن میں ملاقات کی تھی۔

ملاقات میں پاکستان میں جاری ترقیاتی منصوبوں میں عالمی بینک کے تعاون پر بھی تبادلہ خیال کیا گیا تھا۔

اس موقع پرمشیر خزانہ نے ملکی معاشی صورتحال پر روشنی ڈالی اور معاشی استحکام کے لیے لئے اٹھائے گئے حکومتی اقدامات اور ان کے مثبت نتائج کے بارے میں آگاہ کیا تھا۔

عالمی بینک کے نائب صدر ہارٹ ویگ شیفر نے پاکستان کی تعمیر و ترقی میں عالمی بنک کے مکمل تعاون کی یقین دہانی کرائی تھی۔