سوئی سدرن نے 24 گھنٹوں کے لیے کراچی میں سی این جی بحال کرنے کا فیصلہ کیا ہے، گزشتہ کئی ہفتے سے شہر میں سی این جی ایک دن کے تعطل سے آٹھ گھنٹے کے لیے کھولی جارہی تھی ۔

ترجمان سوئی سدرن نے کہا ہے کہ کراچی سمیت سندھ بھر میں سی این جی جمعہ کی صبح 8 بجےبحال کردی جائے گی۔

ترجمان نے مزید کہا کہ سی این جی کی بحالی 24 گھنٹے کے لیے ہوگی۔

پنجاب میں گیس صارفین کیلئے خوشی کی خبر

ترجمان سوئی سدرن نے یہ بھی کہا کہ سی این جی کی آئندہ بحالی کا فیصلہ گیس دستیابی کی صورتحال دیکھ کر ہوگا۔

واضح رہے کہ اس سے قبل دو روز پہلے کراچی میں گیس مسلسل 8 گھنٹوں کے لئے کھولی گئی تھی۔

یہ فیصلہ ہفتے کو آل پاکستان سی این جی ایسوسی ایشن کے صوبائی کوآرڈی نیٹر سمیر نجمل اور ایس ایس جی سی حکام کے درمیان ہونے والے اجلاس میں کیا گیا تھا۔

سمیر نجمل نے بتایا کہ ایس ایس جی سی حکام نے کہا ہے کہ آئندہ ہفتے گیس کا پریشر بہتر ہونے کی توقعات ہیں جس کی وجہ سے سندھ بھر کے سی این جی اسٹیشنز کے لیے گیس کی سپلائی معمول پر آنے کا قوی امکان ہے اور سی این جی سیکٹر کا بحران ختم ہوجائے گا جس کے بعد اس شعبے کے لیے ناغے کا سابقہ شیڈول بحال کردیا جائے گا۔