متحدہ عرب امارات کی جانب سے یہ اعلان کیا گیا ہے کہ متحدہ عرب امارات کے ممتاز سرمایہ کار پاکستان کے چھوٹے اور درمیانے  درجے کے کاروباری شعبے میں سرمایہ کاری کریں گے۔

تفصیلات کے مطابق متحدہ عرب امارات کے سفیر حمد عبید ابراہیم سلیم الزابی نے آج اسلام آباد میں مشیر خزانہ ڈاکٹر عبدالحفیظ شیخ سے ملاقات کی۔

ملاقات میں آئندہ پاک یو اے ای مشترکہ وزارتی کمیشن کے اجلاس کی تیاری کےحوالے سے تبادلہ خیال کیا گیا جو اگلے مہینے کے آخر میں متوقع ہے۔

 متحدہ عرب امارات کے سفیر نے مشیر خزانہ کو اگلے مہینے متحدہ عرب امارات کے ممتاز سرمایہ کاروں کے دورے سے متعلق آگاہ کیا جو چھوٹے اور درمیانے  درجے کے کاروباری شعبے میں سرمایہ کاری سےمواقع کا جائزہ لیں گے۔

 انہوں نے مشیر خزانہ کو دبئی ایکسپو دوہزار بیس کے بارے میں بھی بتایا جہاں کاروبار اور تجارت کے فروغ کےلئے پاکستان کی شرکت متوقع ہے۔

ڈاکٹر حفیظ شیخ نے پاکستان میں سرمایہ کاری کے لئے متحدہ عرب امارات کی دلچسپی کو سراہا انہوں نے کہاکہ دونوں ملکوں کے درمیان دوطرفہ  تجارت کے فروغ کےلئے تمام ممکنہ تعاون فراہم کیا جائے گا۔