عالمی مارکیٹ پر کورونا وائرس کے اثرات سے پاکستان اسٹاک ایکسچینج بھی متاثر ہونے  لگا۔

تفصیلات کے مطابق پاکستان اسٹاک ایکسچینج میں آج شدید مندی ریکارڈ کی گئی ،100انڈیکس 959 پوائنٹس کی کمی کے بعد 39 ہزار 289  کی سطح پر آگیا۔

پاکستان اسٹاک ایکسچینج میں شیئرز کی قیمت کم ہونے سے مارکیٹ کپیٹلائزئشن میں 130 ارب روپے کم ہوگئی ہے۔

ماہرین معاشیات کا کہنا ہے کہ عالمی مارکیٹ میں مندی کے سبب سرمایہ کار محتاط ہوگئے ہیں جس کی وجہ سے پاکستان اسٹاک ایکسچینج بھی متاثر ہورہا ہے۔

سونا آج سے پہلے اتنا مہنگا پہلے کبھی نہیں ہوا

دوسری جانب  ملک بھر میں سونے کی قیمتیں تاریخ کی بلند ترین سطح پر پہنچ گئی ہیں۔

ملک بھر میں فی تولہ سونا 2000 روپے اضافے سے 96300  روپے کی بلند ترین پر پہنچ گیا ہے جبکہ 10گرام سونا 1715 روپے اضافے سے 82562 روپے  کا ہوگیا ہے۔

عالمی مارکیٹ میں فی اونس سونا 40 ڈالر اضافے سے 1684 ڈالر فی اونس کی سطح پر آگیا ہے۔