معیشت کی عالمی ریٹنگ  کے ادارے  موڈیز نے پاکستانی  بینکوں کا آؤٹ لک مستحکم قراردے دیا۔

عالمی ریٹنگ کے ادارے موڈیز نے پاکستانی بینکوں پر رپورٹ جاری کردی ہے جس میں موڈیز کا کہنا ہے کہ پاکستانی بینکوں کا آؤٹ لک آئندہ 18 ماہ تک مستحکم رہے گا جب کہ پاکستانی بینکوں کی ڈپازٹس اور لیکویڈیٹی کی صورت حال بھی بہتر ہے۔

 موڈیز کی رپورٹ کے  مطابق روپے کی قدر میں کمی سے تجارت اور سرمایہ کاری کو فروغ حاصل ہوگا۔

رپورٹ میں یہ بھی کہا گیا کہ اسٹیٹ بینک کی سخت مانیٹری پالیسی سے بینکوں کی آپریشنل مشکلات میں اضافہ ہوا ہے۔

موڈیز  کی رپورٹ میں کہا  گیا کہ پاکستان میں معاشی ترقی کی صورتحال مایوس کن ہونے کے باوجود ایکسچینج ریٹ گزشتہ سال جون سے مستحکم ہے ۔

عالمی ریٹنگ کے ادارے کی رپورٹ کے مطابق مارکیٹ کو امید ہے کہ آئندہ چند برسوں میں اسٹیٹ بینک کی جانب سے پالیسی ریٹ میں کمی کا امکان ہے۔

موڈیز نے امید ظاہر کی کہ حکومت ضرورت پڑنے پر اہم بینکوں کی مدد کرے گی لیکن بی 3 ریٹنگ کی جانب سے عکاسی کرتے ہوئے کہا گیا کہ مالی سال میں درپیش چیلنجز کے سبب اس کی ایسا کرنے کی صلاحیت محدود ہے۔