بجلی کی قیمتوں میں 98پیسے فی یونٹ اضافے کا امکان ظاہر کیا گیا ہے۔

تفصیلات کے مطابق پاور ڈویژن کی کمپنی سنٹرل پاور پرچیزنگ ایجنسی (سی پی پی اے) نے نومبر کی فیول چارجز ایڈجسٹمنٹ کے تحت فی یونٹ بجلی 99 پیسے مہنگی کرنے کی درخواست کر رکھی ہے، بجلی کی قیمت ایک روپے فی یونٹ بڑھانے کی درخواست پر نیپرا کل سماعت کرے گا۔

بجلی کی قیمت بڑھانے کی درخواست فیول ایڈجسٹمنٹ کی مد میں کی گئی جس کے لئے نیپرا کل بجلی کی قیمتوں کے حوالے سے فیصلہ کرے گا۔

درخواست میں کہا گیا ہے کہ نومبر میں پانی سے 39.01 اور کوئلہ سے 27.31فیصد بجلی پیدا کی گئی جبکہ نومبر میں مقامی گیس سے 9.34فیصد بجلی بھی پیدا کی گئی تھی۔

سی پی پی اے نے درخواست میں مزید کہا کہ درآمدی ایل این جی سے 9.20فیصد بجلی پیدا کی گئی جبکہ ایٹمی ذرائع سے 11.55فیصد بجلی پیدا کی گئی۔

درخواست میں بتایا گیا کہ گزشتہ ماہ 7ارب 20کروڑ یونٹ بجلی پیدا کی گئی، پیدا کی گئی بجلی پر 25ارب روپے لاگت آئی اور درآمدی گیس سے 10روپے 5 پیسے فی یونٹ بجلی پیدا کی گئی ہے۔