حکومت کی پیٹرولیم مصنوعات پہ عوام سے  بھاری ٹیکس وصول کرنے کی  ہوشرباتفصیلات سامنے آگئیں۔

وزارت پیٹرولیم  کی جانب سے پیٹرولیم مصنوعات پر ٹیکس کی تفصیلات ایوان بالا (سینیٹ )میں پیش کردی گئیں۔

وزارت پیٹرولیم کی پیش کردہ تفصیلات کے مطابق حکومت فی لیٹر ڈیزل پر 46.28 روپے ٹیکس وصول  کر رہی ہے جبکہ فی لیٹر پیٹرول پر حکومت 35.55روپے ٹیکس وصول کر رہی ہے۔

پیٹرولیم مصنوعات کی قیمتوں میں اضافہ

وزارت پیٹرولیم نے بتایا کہ مٹی کے تیل پر فی لیٹر 20.45روپے ٹیکس وصول کیا جارہا ہے  جبکہ لائٹ ڈیزل پر فی لیٹر15.28 روپے ٹیکس وصول کیا جا رہا ہے۔

اس سے قبل  سینیٹ کی قائمہ کمیٹی برائے پیٹرولیم  کا اجلاس  ہوا جس میں آرایل این جی اور گیس کی قیمتوں کو اکٹھا کرنے کا معاملہ زیر غور آیا۔

سیکرٹری پٹرولیم نے کمیٹی کو بتایا کہ پاکستان میں گیس کی چار مختلف قیمتیں ہیں، ایل این جی پاکستان کی مستقبل کی توانائی کی ضرورتوں کے لیےنا کافی ہوگی۔

چیئرمین کمیٹی نے کہا کہ ایسے اقدامات سے بلوچستان، سندھ اور خیبرپختونخوا کی محرومیوں میں اضافہ ہوگا۔اگر گیس سے پنجاب کی فیکٹریاں چل سکتی ہیں تو بلوچستان کی فیکٹریاں بھی  چل سکتی ہیں۔