لاہور کے تاجروں نے 10مئی کو کاروبار کھولنے کا اعلان کردیا ہے۔

تفصیلات کے مطابق لاہور چیمبر میں 100 سے زائد مارکیٹوں اور انجمن تاجران کے عہدیداروں کا مشاورتی اجلاس ہوا، جس میں تاجروں نے مطالبہ کیا کہ مارکیٹوں اور چھوٹی انڈسٹری کیلئے لاک ڈاؤن فوری طور پر کھولا جائے۔

اجلاس میں لاہور مارکیٹ کے تمام صدور نے مشترکہ طور پر فیصلہ کرتے ہوئے دکانیں 10 مئ کو کھولنے کا اعلان کر دیا۔

لاہور چیمبر کے صدر عرفان اقبال شیخ نے کہا کہ حکومت کی طرف سے تاجروں کو فوری طور پر مارکیٹ کھولنے کی اجازت دی جائے اور اگر 9 مئی کو ریلیف نہ دیا تو تاجر ازخود دکانیں کھولنے کی طرف جائیں گے۔

چیمبر کے صدر عرفان اقبال شیخ نے کہا کہ 10مئی کو دکانیں کھولنے کی اجازت نہ دی گئی تو جیل بھرو تحریک شروع کریں گے۔

صدر اعظم کلاتھ مارکیٹ نے کہا کہ 10 مئی کو اعظم کلاتھ مارکیٹ کھول دیں گے، اگر حکومت ایس او پی بنا کر دے گی تو عمل کریں گے۔

واضح رہے اس سے قبل سندھ حکومت نے لاک ڈاؤن کے دوران کاروبار بحال کرنے سے متعلق زبردست فیصلہ کر لیا تھا۔

سندھ حکومت کا کاروبار سے متعلق زبردست فیصلہ

ذرائع سندھ حکومت نے کہا تھا کہ کاروباری سرگرمیوں کی مشروط  بحالی سے لاکھوں دکان داروں کو فائدہ ہوگاجبکہ مرحلہ وار تجارتی سرگرمیاں بحال ہوں گی۔

ذرائع سندھ حکومت نے یہ بھی کہا تھا کہ صوبائی حکومت دبئی کی طرز پر کاروباری سرگرمیاں بحال کرنے کی خواہاں ہے، مشروط کاروباری سرگرمیوں کی اجازت کے دوران شہری اور کاروباری افراد خود احتیاطی تدابیر پرعمل کے پابند ہوں گے۔