لاہور میں فلور ملز  مالکان نے آٹے کی قیمتوں میں اضافہ کردیا  ہے۔

تفصیلات کے مطابق فلور ملز  مالکان نے بیس کلو گرام آٹے کا تھیلا ایک سو بیس روپے مہنگا کردیا ہے جس کے بعد 20 کلوکے  آٹے کا تھیلا آٹھ سو پانچ روپے سے بڑھ کر نو سو پچیس روپے ہوگیا ہے۔

پاکستان فلور ملز ایسوسی ایشن کا کہنا ہے زیادہ قیمت پر گندم خرید کر سرکاری نرخ پر آٹے کی فراہمی ممکن نہیں ہے۔ فلور ملوں کو سرکاری گندم جاری کی جائے۔

دوسری جانب پنجاب حکومت نے گندم کی قلت کے حوالے سے فلور ملز مالکان کے بیان کو مسترد کر دتے ہوئے فلور ملز مالکان کو طلب کر لیا ہے۔

عبدالعلیم خان کا کہنا ہے کہ  نئے نرخوں کے تعین کے لیے فلور ملز ایسوسی ایشن  سے کل محکمانہ  اجلاس ہو گا ۔ریٹ وہی ہو گا جو انتظامیہ اور محکمہ خوراک کی مشاورت سے طے ہو گا۔

انہوں نے مزید کہا کہ اگر فلور ملز ایسوسی ایشن نے تعاون نہ کیا تو پھر حکومت اپنا طریقہ کار خود طے کرے گی ۔گندم اور آٹے کی عوام کو وافر فراہمی حکومت کی اولین ترجیح ہے ۔پنجاب حکومت کے پاس گندم کے وافر ذخائر موجود ہیں ،قلت نہیں ہو سکتی ۔