پاکستان میں ایران کے سفیر سید محمد علی حسینی کی مشیر تجارت عبدالرزاق داود سے ملاقات ہوئی ہے۔

ملاقات میں فریقین نے باہمی تجارت کے لیے ہفتہ میں سات روز پاک ایران سرحد کھولنے کے فیصلے کو سراہا ہے۔

ذرائع کا کہنا ہے کہ ایران کی وزارت زراعت اور پاکستان کے محکمہ تحفظ نباتات کی جانب سے 6 مزید پاکستانی کمپنیوں کو ایران میں آم برآمد کرنے کی اجازت دینے کا فیصلہ کیا گیا ہے۔

ملاقات میں ایرانی سفیر سید محمد علی حسینی کا کہنا تھا کہ کوئٹہ میں ایرانی قونصل خانہ نے روزانہ آم کی 30 شپمنٹس ایران برآمد کرنے کے لئے دستاویزات کی تصدیق کا فیصلہ کر لیا ہے جبکہ  دونوں فریقین کے مابین اتفاق ہوا ہے کہ سرحد تک پاکستانی ٹرک اور سرحد سے پار ایرانی ٹرک آم لے کر جائیں گے۔

 یہ فیصلہ بھی کیا گیا ہے کہ کوویڈ 19 کے تناظر میں آم کی برآمدات میں تمام ایس او پیز اور احتیاطی تدابیر اختیار کی جائیں گی جبکہ آموں کی سرحد پار برآمدات کے بعد ایران اور وسطی ایشیا تک آموں کی رسائی میں ایرانی حکومت تمام ممکنہ سہولیات فراہم کرے گی۔

پاکستان سے آموں کی ایران اور وسطی ایشیاء تک برآمدات کے حوالے سے ایرانی سفیر براہ راست وزارت تجارت سے رابطہ میں رہیں گے۔

خیال رہے کہ ملاقات میں دونوں فریقین کی جانب سےکورونا وائرس کے حوالے سے تمام احتیاطی تدابیر اختیار کی گئیں۔