سندھ حکومت کی جانب سے انٹر سٹی ٹرانسپورٹ چلانے کی اجازت دے دی گئی ہے۔

تفصیلات کے مطابق سندھ حکومت کی جانب سے انٹر سٹی (ایک ضلع سے دوسرے ضلع تک) چلنے والی ٹرانسپورٹ کو چلانے کی اجازت دے دی گئی ہے۔

صوبائی وزیر ٹرانسپورٹ اویس شاہ نے کہا ہے کہ ایک ضلعے سے دوسرے ضلعےمیں چلنے والی تمام مسافر گاڑیوں کو ایس او پیز کہ تحت چلانے کی اجازت دی گئی ہے۔

اویس شاہ نے واضح کیا ہے کہ مسافر گاڑیوں میں مسافروں کے درمیان تین فٹ کا فاصلہ رکھنا لازمی ہوگا جبکہ تمام مسافر کوچ، وین اور بسوں میں ماسک اور سینیٹائیزر کا استعمال بھی لازمی ہوگا۔

انہوں نے مزید کہا ہے کہ تمام مسافر گاڑیاں سندھ حکومت کہ مقرر کردہ بس اڈوں سے نکلیں گی جبکہ ایس او پیز کی خلاف ورزی پر ٹرانسپورٹروں کے خلاف کارروائی کی جائیگی۔

سندھ حکومت نےٹرانسپورٹ کھولنے کی اجازت دے دی

واضح رہے کہ اس سے قبل ماہ جون کے آغاز میں وزیرٹرانسپورٹ اویس شاہ اور ٹرانسپورٹرز کے درمیان مذاکرات کامیاب ہوگئے تھے جس کے بعد سندھ حکومت نے اندرون شہر ٹرانسپورٹ کھولنے کی اجازت دی تھی۔

اویس شاہ نے مذاکرات کامیاب ہونے کی تصدیق کرتے ہوئے کہا تھا کہ کراچی شہر کے اندر کل سے ٹرانسپورٹ چلانے کی اجازت دے دی ہے۔

وزیر ٹرانسپورٹ کا کہنا تھا کہ  گاڑیوں میں اضافی مسافر نہیں بٹھائے جائیں گے، تمام ٹرانسپورٹرز کو ایس او پیز پر عمل کرنا پڑے گا، اگر عمل نہ کیا گیا تو گاڑیاں بند کردی جائیں گی۔

انہوں نے کہا تھا کہ جس گاڑی میں ماسک اور  سینیٹائزر نہیں ہوگا اس کے خلاف کارروائی ہوگی، منظور شدہ اڈوں سے گاڑیاں نکلیں گیں اور خلاف ورزی پر کارروائی ہوگی، ٹرانسپورٹ سے متعلق آج رات تک نوٹیفکیشن جاری کردیں گے۔

وزیرٹرانسپورٹ نے ایس اوپیزپر عملدرآمدکے لیے مانیٹرنگ اور انسپیکشن ٹیم بھی تشکیل دی تھی جس میں ٹرانسپورٹ اور ریونیو کے افسران شامل ہوں گے۔