فیڈرل بورڈ آف ریونیو (ایف بی آر) کا کہنا ہے کہ کورونا وباء کے باعث ٹیکس محصولات میں 16 فیصد کمی دیکھی گئی ہے۔

کورونا لاک ڈاؤن کے باعث محصولات میں 16 فیصد کمی ایف بی آر مارچ تا جون 2020 کے 4 ماہ میں صرف 1258 ارب روپے جمع کرسکا ہے جبکہ گزشتہ سال ان 4 ماہ میں 1497 ارب روپے کا ٹیکس جمع کیا گیا تھا۔

ذرائع ایف بی آر کا کہنا تھا کہ کسٹم ڈیوٹی کی مد میں بھی 20 فیصد کی کمی آئی ہے جبکہ گزشتہ سال ان 4 ماہ میں 241.5 ارب روپے کی کسٹم ڈیوٹی جمع ہوئی تھی اور اس سال مارچ تا جون صرف 193 ارب روپے کی کسٹم ڈیوٹی جمع کی جاسکی ہے۔

سیلز ٹیکس کی مد میں 16 فیصد کی کمی آئی ہے، گزشتہ سال 549 ارب روپے جمع ہوئے جبکہ اس سال اسی عرصہ میں 462.6 ارب روپے جمع ہوئے ہیں۔

فیڈرل ایکسائز ڈیوٹی کی مد میں 16.5 فیصد کمی آئی، گزشتہ سال مارچ تا جون 100 ارب روپے جمع ہوئے تھے رواں مالی سال اسی عرصہ میں صرف 84.4 ارب روپے جمع کیئے جاسکے ہیں۔

براہ راست جمع کیئے جانے والے ٹیکسوں کی کلکشن میں 14.66 فیصد کمی آئی ہے جبکہ گزشتہ سال اسی عرصہ میں 607 ارب جبکہ رواں مالی سال 518 ارب روپے جمع کیئے جاسکے ہیں۔