وفاقی وزیر حماد اظہر نے کہا ہے کہ ملک میں چینی کی قلت نہیں ہے، چینی پورے ملک میں وافر موجود ہے۔

 تفصیلات کے مطابق وزیراعظم عمران خان کی زیر صدارت پارٹی اور حکومتی ترجمانوں کا اجلاس منعقد ہوا، اجلاس میں ملکی سیاسی، معاشی، کورونا سمیت مہنگائی کی صورتحال پر گفتگو بھی کی گئی ہے۔

اس دوران حماد اظہر کا کہنا تھا کہچینی یوٹیلیٹی اسٹورز میں 68 روپے فی کلو دستیاب ہے کیونکہ اس بار کرشنگ میں ایک دن کی بھی تاخیر نہیں ہوئی ہے۔

وزیراعظم عمران خان نے کہا ہے کہ حکومتی اقدامات سے مہنگائی میں کمی ہوئی ہے تاہم مہنگائی میں مزید کمی کے لیے اقدامات کررہے ہیں۔

یاد رہے کہ اس سے قبل وزیر اعظم عمران خان سے ملک کے معروف  صنعتکاروں پر مشتمل وفد نے ملاقات کی۔

اس موقع پر وزیر اعظم نے کہا کہ  حکومت کا کام صنعتوں اور کاروباری سرگرمیوں  کے لیے آسانیاں اور سہولتیں فراہم کرنا ہے۔ ملکی ترقی و خوشحالی صنعتی شعبے اور کاروباری طبقے کی ترقی سے وابستہ ہے۔

عمران خان کا کہنا تھا کہ  حکومتی فیصلہ سازی کے عمل میں صنعتکاروں کی تجاویز کو شامل کیا جا رہا ہے جس سے   مثبت اثرات مرتب ہو رہے ہیں۔

وزیر اعظم  نے صنعتکاروں کو ایکسپورٹس میں پیش آنے والے مشکلات کو جلد از جلد حل کرنے کی ہدایت کی اور  صنعتکاروں سے زراعت کے شعبے میں جدت لانے سے متعلق تجاویز مانگ لیں۔