مشیر خزانہ عبدالحفیظ شیخ نے کہا ہے کہ حکومت چکن سمیت دیگر مہنگی اشیاء کی قیمتوں کو کنٹرول کرنے کے اقدامات کر رہی ہے۔

تفصیلات کے مطابق ویڈیو لنک کے ذریعے مشیر خزانہ کی زیر صدارت نیشنل پرائس مانیٹرنگ کمیٹی کا اجلاس منعقد ہوا جس میں آٹا، چینی ٹماٹر، پیاز، چکن اور دیگر اشیائے ضروریہ کی قیمتوں کا جائزہ لیا گیا۔

مشیرخزانہ کی اشیائے خوردنوش کی قیمتوں میں کمی کے رجحان پر اطمینان کا اظہار کرتے ہوئے کہا ہے کہ صارفین کو سستے داموں اشیاکی فراہمی ہماری ذمہ داری ہے۔

اجلاس میں انہوں نے بتایا کہ حکومت کی کوششوں اور بروقت مداخلت سے گندم اور چینی کی قیمتوں کو کنٹرول کیا تاہم اشیاء مہنگی کرنے والوں کےخلاف ایکشن لینے کی ہدایت بھی کی گئی ہے۔

یاد رہے کہ اجلاس کو بریفنگ میں بتایا گیا ہے کہ13 اشیاضروریہ کی قیمتوں کمی ہوئی ہے جبکہ 21 اشیائے ضروریہ کی قیمتوں میں استحکام رہا ہے جبکہ ملک میں چینی اور آٹے کے تسلی بخش ذخائر موجود ہیں۔