پاور سیکٹر کےحوالے سے بڑی خوشخبری، حکومت اور آئی آئی پیز کے درمیان معاہدہ طے پاگیا ہے۔

ذرائع کے مطابق حکومتی مذاکراتی ٹیم اور شمسی توانائی پر مشتمل آئی پی پیز نے ٹیرف کم کرنے پر آمادگی ظاہر کردی ہے۔  معاہدے پر باضابطہ دستخط وفاقی کابینہ کی منظوری کے بعد  ہوں گے۔

ذرائع کا کہنا ہے کہ معاہدے کی رو سے ہر آئی پی پی کا اپنا اپنا بورڈ بھی معاہدے کی منظوری دے گا۔  معاہدے سے ٹیرف اور آئندہ سالوں میں سرکلر ڈیٹ میں کمی آئے گی۔

ذرائع کا مزید کہنا ہے کہ حکومت اور آئی پی پیز دونوں  ملک کے وسیع تر مفاد میں کمپنیز کنٹریکٹ میں ترمیم پر رضامند ہوئے ہیں۔ کمپنیز پاور سیکٹر کے استحکام  کے لیے کنٹریکٹ میں ترمیم پر راضی ہوئیں۔

حکومت کمپنیز کی قرض خواہوں سے ازسر نومفاہمت کرائےگی اور  کمپنیز کو موجودہ سولر سائٹس پر اضافی پیداوار میں مدد کرے گی۔

یاد رہے کہ گذشتہ سال اگست میں وزیر اعظم عمران خان کی زیر صدارت پاور سیکٹر میں اصلاحات سے متعلق اجلاس ہوا تھا   جس میں بجلی کے شعبے سے متعلق امور، اصلاحات اور تنظیم نو کے مجوزہ روڈ میپ پر تبادلہ خیال کیا گیا تھا۔

گردشی قرضوں کے معاملے اور آئی پی پیز کے ساتھ بات چیت سمیت دیگر متعلقہ امور بھی زیر بحث آئے  تھے۔