ای سی سی اجلاس میں 30 جون 2021 سے بھارت سے کاٹن یارن اور چینی کی درآمد کی منظوری دے دی گئی ہے۔

تفصیلات کے مطابق وفاقی وزیر خزانہ حماد اظہر کی زیر صدارت اقتصادی رابطہ کمیٹی کا اجلاس منعقد ہوا جس میں وزارتوں کی تکنیکی ضمنی گرانٹس کی منظوری سمیت بھارت سے کاٹن یارن اور چینی کی درآمد کی منظوری دے دی گئی ہے۔

اس ضمن میں ذرائع کا کہنا ہے کہ نجی شعبہ بھارت سے پانچ لاکھ میٹرک ٹن چینی درآمد کرسکے گا اور بھارت سے روئی کی درآمد کے حجم پر کوئی قید نہیں ہوگی۔

اجلاس میں اقتصادی رابطہ کمیٹی نے یکم اپریل سے گندم کی امدادی قیمت 1800 روپے مقرر کردی ہے جبکہ پاکستان اسٹیل ملز کیلئے 2 ارب 52 کروڑ روپے کی حکومتی گارنٹی کی منظوری بھی دی گئی ہے۔

یاد رہے کہ ای سی سی اجلاس میں پی آئی اے کمپنی کی ری اسٹرکچرنگ کا ایجنڈا مؤخر کردیا گیا ہے۔