اسلام آباد: وفاقی کابینہ نے پرانے پاکستانی کرنسی نوٹوں کی تبدیلی میں توسیع کی منظوری دے دی ہے۔

وزیر اعظم عمران خان کی زیر صدارت اجلاس میں وفاقی کابینہ نے پرانے پاکستانی کرنسی نوٹ 10، 50، 100 اور 1000 کی تبدیلی کی مدت میں 31 دسمبر 2022 تک توسیع کی منظوری دے دی ہے۔

وزیر اعظم عمران خان کے معاون خصوصی ڈاکٹر فیصل سلطان نے اجلاس کے دوران کورونا کی نئی قسم اومی کرون کے حوالے سے احتیاطی تدابیر پر بریفنگ دی جبکہ کابینہ نے ویکسی نیشن کو بڑھانے، سماجی فاصلہ برقرار رکھنے سمیت ماسک پہننے کی ضرورت پر زور دیا۔

رپورٹ کے مطابق پاکستان میں 2 کروڑ افراد ایسے ہیں جنہوں نے ابھی تک کورونا وائرس کی دوسری ڈوز نہیں لگوائی ہے جبکہ اس حوالے سے کابینہ نے شہریوں سے جلد از جلد دوسری ڈوز لگوانے کی ہدایت کی ہے۔

اجلاس کو الیکٹرانک ووٹنگ مشین متعارف کرانے اور سمندر پار پاکستانیوں کے حق رائے دہی کے حوالے سے بریفنگ دی گئی جبکہ کابینہ نے اسلام آباد میں بلدیاتی انتخابات میں الیکٹرانک ووٹنگ مشین کے استعمال کے ای سی پی کے فیصلے کا خیرمقدم کیا۔

اجلاس میں کابینہ کو ملک کے تمام پولنگ اسٹیشنز پر الیکٹرانک ووٹنگ مشینوں کی ترسیل اور اس کے استعمال سمیت عملے کی تربیت کے حوالے سے شیڈول پر تفصیلی بریفنگ دی گئی۔

کابینہ نے الیکٹرانک ووٹنگ مشینوں اور سمندر پار پاکستانیوں کے حق رائے دہی سے متعلق قوانین کے نفاذ کے بعد اگلے انتخابات الیکٹرانک ووٹنگ مشینوں کے ذریعے کرانے کے لیے پختہ عزم کا اظہار کیا۔

مشیر خزانہ نے وفاقی کابینہ کو اشیائے ضروریہ کی قیمتوں کا تقابلی جائزہ پیش کیا جس میں ہفتہ وار مہنگائی کی شرح میں 0.07 فیصد کی کمی آئی ہے۔ چینی، آٹا اور گھریلو استعمال کی اشیاء کی قیمتیں کم ہوگئیں، مجموعی طور پر 9 اشیاء کی قیمتوں میں کمی ہوئی جبکہ 23 اشیاء کی قیمتوں میں استحکام رہا۔

کابینہ کو بتایا گیا کہ خطے میں بناسپتی گھی اور چائے کی پتی کی قیمتوں کے علاوہ دیگر تمام ضروری اشیاء کی قیمتیں پاکستان میں کم ہیں جبکہ ان اشیاء میں آٹا، چنے، دال ماش، دال مونگ، ٹماٹر، پیاز، چکن اور پیٹرول شامل ہیں۔ سندھ میں آٹا، چینی، دودھ، گھی اور دالوں سمیت اشیائے ضروریہ کی قیمتوں میں اضافے پر تشویش کا اظہار کیا گیا۔

پاکستان اور وسطی ایشیائی ممالک کے درمیان تجارت کو فروغ دینے کے لیے کابینہ نے ایوی ایشن ڈویژن کو تمام وسطی ایشیائی ممالک کے ساتھ ہوائی سفری معاہدوں کو حتمی شکل دینے پر کام شروع کرنے کی ہدایت کی۔