خیبر پختونخوا کے بعد صوبہ بلوچستان کے دارالحکومت کوئٹہ میں بھی ایل پی جی مہنگی ہوگئی۔

تفصیلات کے مطابق کوئٹہ میں ایل پی جی سلنڈرز کی قیمتوں میں 300 سے 350  روپے تک کا اضافہ ہوگیا ہے۔

قیمتوں میں اضافے کے بعد  گھریلو استعمال کے ایل پی جی سلنڈرز 1700 سو سے 2000 روپے میں فروخت ہورہے ہیں۔

اس سےقبل  خیبرپختونخوا میں بھی ایل پی جی کی قیمت میں اضافہ ریکارڈ کیا گیا تھا۔

ایل پی جی ڈیلرز کے مطابق خیبر پختونخوا میں 15 کلو  کے گھریلو گیس سلنڈرکی قیمت میں 200 روپے تک کا اضافہ ہوگیا ہے۔

خیبرپختونخوا میں فی کلو گیس 200 سے 220 روپے تک فروخت ہورہی ہے جبکہ ایل پی جی کی قیمتیں روزانہ کی بنیاد پر تبدیل  بھی ہوتی ہیں۔

ڈیلرز کا  کہنا ہے  گھریلو صارفین گیس لوڈشیڈنگ اور کم پریشر کے باعث ایل پی جی استعمال کرنے پر مجبور ہیں۔ مانگ میں اضافے اور سپلائی میں کمی کے باعث قیمتوں میں اضافہ ہونے لگا ہے۔

ڈیلرز کا کہنا ہے کہ پشاور میں تین دن تک ایل پی جی کے پلانٹ بند ہونے کی وجہ سے گیس  کی شارٹیج ہوئی۔

دوسری جانب شہریوں کا کہنا ہے کہ  پیٹرولیم مصنوعات کی قیمتوں میں اضافہ نہیں ہوا تو گیس مہنگی کردی  گئی۔