وزارت آئی ٹی و ٹیلی کمیونیکیشن نے فائیو جی لائسنس نیلامی کیلئے ایڈوائزری کمیٹی کے قیام کا نوٹی فکیشن جاری کردیا

نوٹی فکیشن کے مطابق وزیر خزانہ شوکت ترین کی سربراہی میں 5جی ایڈوائزری کمیٹی 13 ارکان پر مشتمل ہوگی۔

کمیٹی کے ارکان میں وفاقی وزیر آئی ٹی و ٹیلی کمیونیکیشن سید امین الحق، وزیر سائنس و ٹیکنالوجی شبلی فراز، وزیر صنعت و پیداوار اور مشیر تجارت و سرمایہ کاری شامل ہوں گے۔

اس کے علاوہ کمیٹی میں وزارت خزانہ، آئی ٹی اور قانون کے سیکریٹریز، ممبر ٹیلی کام ،چیئرمین پی ٹی اے اور فریکیونسی ایلوکیشن بورڈ کے ممبر بھی شامل ہوں گے۔

مزید پڑھیے: امریکا میں محدود سطح پر 5 جی کے اجراء کے باوجود پروازیں منسوخ

کمیٹی سے متعلق وفاقی وزیر آئی ٹی سید امین الحق نے کہا ہے کہ کمیٹی عالمی معیار کے مطابق پاکستان میں دستیاب اور استعمال ہونے والے اسپیکٹرم کا جائزہ لے گی۔

امین الحق نے کہا کہ ایڈوائزری کمیٹی 5جی سروسز شروع کرنے کے لئے اسٹریٹجی پلان کے جائزے کے بعد اس کی منظوری دے گی۔

وفاقی وزیر کا کہنا تھا کہ اسٹریٹیجی پلان کے لئے اسٹیک ہولڈرز خصوصاً ٹیلی کام کمپنیوں سے بھی مشاورت کی جائے گی، ٹیلی کام سیکٹرز کیلئے اصلاحات و مراعات کے معائنے کے بعد اس کو حتمی شکل دی جائے گی۔

سید امین الحق نے مزید کہا کہ کمیٹی کنسلٹنٹ کی تجاویز کی روشنی میں 5 جی اسپیکٹرم نیلامی کے طریقہ کار کی منظوری بھی دے گی۔

مزید پڑھیے: اوپو کے سستے ترین 5 جی فون مارکیٹ میں آنے کو تیار

وفاقی وزیر نے کہا کہ 5 جی اسپیکٹرم نیلامی میں ٹیلی کام سیکٹرز کے تحفظات کو مد نظر رکھتے ہوئے اسے قابل عمل بنایا جائے گا۔

امین الحق نے کہا کہ ڈیجیٹیل پاکستان وژن کے تحت 5 جی ایکو سسٹم کا قیام عوام اور ملک کی معاشی ترقی کے لئے اہم ہے، کوشش ہے کہ دسمبر 2022 یا جنوری 2023 تک ملک میں فائیو جی سروسز کا آغاز کردیا جائے۔

وفاقی وزیر آئی ٹی وٹیلی کام نے کہا کہ ابتدائی طور پر ملک کے 5 بڑے شہروں میں فائیو جی سروس شروع کی جائے گی۔

سید امین الحق نے کہا کہ ٹیلی کام سیکٹرز پر اضافی ٹیکسز کے نفاذ سے کچھ مشکلات پیدا ہوئی ہیں،اصولی طور پر ٹیلی کام سیکٹرز کو جتنی مراعات دی جائیں، ملک کو اتنا زیادہ ریونیو حاصل ہوتا ہے۔