چیئرمین نیپرا توصیف ایچ فاروقی نے کہا ہے کہ پاور پلانٹس کیلیے کوئلہ خریداری میں بڑے پیمانے پر پیسے بنانے کی شکایات ملی ہیں۔

چیئرمین نیپرا توصیف ایچ فاروقی کی سربراہی میں کوئلے کی قیمت کے نئے طریقہ کار سے متعکق درخواستوں پر سماعت کی گئی۔

نجی کمپنیوں کے سوال پر چیئرمین نیپرا نے بتایا کہ ہم نے کوئلے کی قیمت کے نئے طریقہ کار پر کنسلٹنٹ کی خدمات لیں تھیں، اس کے علاوہ ہمیں حکومت کی طرف سے بھی کوئلے کی قیمت پر غور کرنے کا کہا گیا۔

سیمنٹ انڈسٹری حکام نے موقف اپنایا کہ ان کے کوئلے کی فراہمی کے لیے کسی کمپنی کے ساتھ طویل مدت کے خریداری معاہدے نہیں ، فیکٹریاں کوئلے کی اسپاٹ خریداری کرتی ہیں جس کی لاگت کافی کم ہوتی ہے۔

نیپرا حکام نے کہا کہ سیمنٹ انڈسٹری کم قیمت پر معیاری کوئلہ خریداری کرتی ہے، کوئلے کی قیمت کم ہو گی تو صارفین کو ریلیف ملے گا لیکن گزشتہ 3 سال میں کوئلے سے چلنے والے پاور پلانٹس نے صارفین کو کوئی ریلیف نہیں دیا، نیپرا چاہتا ہے کہ طویل مدت کے ساتھ اسپاٹ خریداری کا طریقہ کار بھی اختیار کیا جائے تاکہ صارفین کو ریلیف ملے۔

نجی کمپنیوں نے موقف اختیار کیا کہ کوئلے کی قیمت اے پی آئی معیار کی انڈیکس کے تحت طے ہوتی ہے، اگر کوئلے کی قیمت میں کمی ہو گی تو صارفین کو ریلیف فراہم کیا جائے گا، کوئلے کے پاور پلانٹس کو بجلی کی خریداری کے معاہدوں کے مطابق صرف 10 فیصد تک اسپاٹ خریداری کی اجازت ہے۔

کمپنیوں نے کہا کہ کوئلے سے چلنے والے پاور پلانٹس پہلے ہی نقصان میں کام کر رہے ہیں، کوئلے کی کلیئرنس میں تاخیر پورٹ اتھارٹیز کے باعث ہوتی ہے لیکن بندر گاہ میں کوئلے تاخیر سے اٹھانے پر جرمانے کی قیمت ہمیں نہیں دی جا رہی۔

چیئرمین نیپرا نے نجی کمپنیوں کے اعتراض پر ریمارکس دیئے کہ نجی کمپنیوں نے یہ معاملہ کبھی نیپرا کے سامنے نہیں اٹھایا، اگر ایسی صورت حال ہے تو کمپنیاں اپنی درخواست لے کر آئیں۔

چیئرمین نیپرا نے نجی کمپنیوں سے مکالمے کے دوران کہا کہ ہم آپ کو کوئی چیز تبدیل کرنے کا نہیں کہہ رہے، ہمارا کہنا اتنا ہے کہ کوئلے کی قیمت میں کمی کا فائدہ صارفین کو دیا جائے۔

دوران سماعت کوئلے کے عالمی ماہر کی جانب سے رائے دی گئی کہ اعلی معیار کوئلے کا انڈیکس زیادہ ہے مگر اس سے تھوڑا سے کم معیار کوئلے کا انڈیکس خاصا نیچے ہے ، بھارت پاکستان سے 100 ڈالر سے کم لاگت پر کوئلہ خریداری کر رہا ہے، پاکستان بھی بھارت اور چین کی طرح کم معیار کوئلے کی انڈیکس کو قیمت کے تعین کے لئے استعمال کرے۔

عالمی ماہر کے جواب میں نجی کمپنیوں نے کہا کہ پاور پلانٹس کو آر بی ٹو معیار کا کوئلہ استعمال کرنے کی اجازت نہیں ، کوئلے کے سپلائرز کو فوری طور پر تبدیل بھی نہیں کر سکتے۔

چیئرمین نیپرا نے کہا کہ کوئلے کی خریداری میں بڑے پیمانے پر پیسے بنانے کی شکایات موصول ہوئی ہیں ، ہم آپ کے ساتھ سختی نہیں کرنا چاہتے تاہم آپ کو بھی تعاون کرنا ہو گا ، ہمیں آپ کی طرف سے سنجیدہ کوششیں اور تعاون نظر آنا چاہیے۔

توصیف فاروقی نے مزید کہا کہ نیپرا صارفین کو سستی بجلی فراہمی کیلئے قائم کیا گیا ہے، نیپرا اپنا مینڈیٹ پورا کرنے کے لئے تمام اقدامات اٹھائے گا۔