حکومت نے رمضان المبارک کے لیے بڑے ریلیف پیکج کا اعلان  کردیا۔

تفصیلات کے مطابق  وفاقی وزیرخزانہ شوکت ترین کی زیر صدارت اقتصادی رابطہ کمیٹی (ای سی سی) کا اجلاس ہوا۔

اجلاس میں وفاقی وزراء، معاونین اور مشیروں سمیت دیگر اعلیٰ حکام  نے شرکت کی۔

ای سی سی کے جاری کردہ اعلامیے میں بتایا گیا ہے کہ 8.2  ارب  روپے کے رمضان ریلیف پیکج کی منظور دے دی گئی ہے۔رمضان پیکج 2 کروڑ افراد  کے بجائے ملک بھر کی عوام  کے لیے دستیاب ہوگا۔

اجلاس میں جی ٹوئنٹی ممالک کی جانب سے قرض موخر کے اقدامات کی منظوری بھی دی گئی۔ جی ٹوئنٹی کے 15 ممالک  کے ساتھ قرض موخر کے اقدامات  کیے جائیں گے۔

ایل این جی ٹو پائپ لائن منصوبے  کے لیے 21 ارب  روپے کی بینک گارنٹی کی منظوری دی گئی۔

اجلاس میں جھل مگسی فیلڈ سے ایس ایس جی سی ایل کو 15 ایم ایم سی ایف ڈی گیس کی دوبارہ فراہمی  اور  ماڑی گیس فیلڈ سے ایس این جی پی ایل کو 110 ایم ایم سی ایف ڈی گیس کی فراہمی کی بھی منظوری دی گئی۔

کپاس کی 2022-23ء کی فصل  کے لیے کم از کم 5700 روپے من قیمت مقرر کردی گئی ہے۔ای سی سی نے ابتدائی طور پر کپاس کی 2 ملین گانٹھوں کی خریداری کا ہدف رکھا  ہے۔

ای سی سی اجلاس میں پاکستان ملٹری اکاؤنٹس ڈپارٹمنٹ  کے لیے 200 ملین کی تکنیکی سپلیمنٹری گرانٹ کی منظوری بھی دی گئی۔ پاک یونیورسٹی آف انجینئرنگ اینڈ ایمرجنگ ٹیکنالوجی  کے لیے 3.50 ارب  روپے کی تکنیکی گرانٹ  بھی منظور کی گئی۔

پی ایس او اور آئل مارکیٹنگ کمپنیز  کے لیے تیل کی قیمتوں کے فرق  کے لیے 11.73 ارب  روپے اضافی منظور کیے گئے۔

یہ سپلیمنٹری گرانٹ کی رقم 31 مارچ تک  کے لیے فراہم کی جائے گی۔