پاکستان بزنس کونسل نے وزیر اعظم شہباز شریف کو خط لکھ کر پیٹرولیم مصنوعات پر سبسڈی ختم کرنے کی اپیل کردی ہے۔

پاکستان بزنس کونسل نے وزیر اعظم شہباز شریف کو خط لکھا ہے جس میں انہوں نے کہا ہے کہ حکومت عوامی مقبولیت کے فیصلوں کی بجائے ٹھوس اقدامات اٹھائے۔

پاکستان بزنسل کونسل نے تجاویز دی ہیں کہ ورک فروم ہوم کی اجازت دی جائے، کمرشل سینٹرز اور شادی ہالز کو بند کرنے کے احکامات بھی جاری کیے جائیں۔

وزیر اعظم کو لکھے گئے خط میں انہوں نے لکھا کہ سری لنکا جیسے حالات سے بچنے کے لیے جلد از جلد آئی ایم ایف سے بات شروع کی جائے اور پیٹرولیم مصنوعات پر دی گئی سبسڈی کو بینظیر انکم سپورٹ پروگرام کے ذریعے دیا جائے۔

ایسے اقدامات نہ اٹھائیں جائیں جس سے مہنگائی میں اضافہ ہو اور غیر ضروری اشیا کی درآمداد پر پابندی عائد کی جائے جبکہ برآمدات میں اضافے کے لیے ٹیکسٹائل کے علاوہ دیگر مصنوعات پر ٹیکس کی چھوٹ دی جائے۔

انہوں نے خط میں مشورہ دیا ہے کہ مناسب ایکسچینج ریٹ کا تعین کیا جائے، توانائی کی قلت پر قابو پانے کے لیے ملک میں مزید ایل این جی ٹرمینلز کی تعمیر شروع کی جائے جس سے دیگر ٹرمینلز کی کارکردگی بھی بڑھے گی۔

خط میں یہ بھی تجویز دی گئی ہے کہ آئی ایم ایف کا پروگرام دوبارہ شروع کیا جائے اور درآمدات کو کم کرکے ملکی زرمبادلہ پر دباؤ کو کم کیا جائے جبکہ غیر ضروری اشیا پر درآمدی ڈیوٹی کو بڑھایا جائے۔