لاہور چیمبر آف کامرس اینڈ انڈسٹری کے سابق سینئر نائب صدر خواجہ خاور رشید نے وزیراعظم شہباز شریف پر زور دیا ہے کہ موجودہ سنگین اکنامک بحران سے چھٹکارا حاصل کرنے کے لیے چین ، سعودی عرب اور ترکی سمیت دیگر دوست ممالک سے اقتصادی تعاون کی درخواست کی جائے۔

پنجاب ڈائیز اینڈ کیمیکلز مرچنٹس ایسوسی ایشن کے چیئرمین اور لاہور چیمبر آف کامرس اینڈ انڈسٹری کے سابق سینئر نائب صدر خواجہ خاور رشید نے کہا کہ اگرچہ اس وقت اکانومی شدید بحران میں ہے لیکن اس کا بوجھ پٹرول کی قیمت میں بھاری اضافے یا پھر کسی اور طریقے سے بزنس کمیونٹی اور عام لوگوں پر ڈال دیا گیا تو ایک اور بحران پیدا ہوجائے گا۔

 انہوں نے کہا کہ اگر دوست ممالک پاکستان کی مدد کرتے ہیں تو کڑے فیصلے کیے بغیر اکنامک بحران سے نمٹاجاسکتا ہے۔

 خواجہ خاور رشید نے کہا ہے کہ لوڈشیڈنگ پھر سر اٹھارہی ہے، روپیہ ڈالر کے مقابلے میں غیر مستحکم ہے، ایکسپورٹ تسلی بخش نہیں ہے۔

انکا مزید کہنا تھا کہ بجلی گیس پٹرول کی قیمتیں بلند سطح پر ہیں جس کی وجہ سے بزنس کمیونٹی کو بے شمار مشکلات کا سامنا کرنا پڑ رہا ہے۔ اس لیے وقت ضائع کیے بغیر اقدامات کیے جائیں۔