اسلا آباد: وزیر اعظم  شہباز شریف نے یوٹیلیٹی اسٹورز پر خریداری کیلئے استعمال ہونے والا ون ٹائم پاس ورڈ سسٹم کو ختم کردیا ہے۔

وزیر اعظم  شہباز شریف نے عوام کی مشکلات کو مدنظر رکھتے ہوئے بڑا فیصلہ کیا ہے جبکہ یوٹیلیٹی اسٹورز پر سبسڈائزڈ اشیاء کی خریداری کیلئے شناختی کارڈ کی فوٹو کاپی کی شرط کو بھی ختم کر دیا ہے۔

یوٹیلیٹی اسٹورز پر سبسڈائزڈ اشیاء کی خریداری کیلئے اب صرف اصل شناختی کارڈ کاؤنٹر پر دکھانا ہوگا اور خریداری کے بعد کسٹمر کے رجسٹرڈ موبائل نمبر پر تصدیقی ایس ایم ایس موصول گا۔

یوٹیلیٹی اسٹورز کارپوریشن اصل مستحقین تک حکومت کی سبسڈی شفاف انداز سے منتقل کرنے کی حکمت عملی پر عمل پیرا ہے۔

لاہور اور اسلام آباد کے ہر سپر مارکیٹ اسٹور اور منی مارکیٹ میں پی او ایس کاوئنٹرز کی تعداد کو بتدریج بڑھایا جارہا ہے۔

وزیر اعظم نے صارفین کے لیے واٹر کولر، ٹینٹ، کرسیاں اور پنکھے کی فراہمی کے لئے پنجاب کے تمام ڈپٹی کمشنرز کو آئی سی ٹی سے رابطہ کی تاکید کی ہے جبکہ پہلے سے موجود ٹینٹ اور پانی کے بندوبست کو مزید بہتر کرنے کے لئے احکامات بھی جاری کردیے گئے ہیں۔

واضح رہے کہ تمام یوٹیلیٹی اسٹورز پر چینی 70 روپے فی کلو، گھی 300 روپے فی کلو جبکہ آٹے کا 10 کلو تھیلہ 400 روپے میں دستیاب ہے۔

تمام یوٹیلیٹی اسٹورز پر چاول اور دالوں پر بھی سبسڈی دی جارہی ہے جبکہ 1500 سے زائد معیاری اشیاء بھی عام مارکیٹ کی نسبت بہت کم قیمت پر دستیاب ہیں۔