ملک میں مہنگائی کی شرح تاریخ  کی بلند ترین سطح پر پہنچ گئی ہے۔

تفصیلات کے مطابق ادارہ شماریات نے ہفتہ وار مہنگائی کے  نئے اعداد و شمار جاری کر دیے۔

ایک ہفتے کے دوران مہنگائی کی شرح میں تاریخی اضافہ  ہوا ہےجس کے بعد  مہنگائی کی مجموعی شرح 37.67 فیصد تک پہنچ گئی ہے۔

ادارہ شماریات کے اعداد و شمار کے مطابق  ایک ہفتے میں 30 اشیاء کی قیمتوں میں اضافہ ہوا  ہے۔

گزشتہ ایک ہفتے کے دوران بجلی کی فی یونٹ قیمت میں ایک روپے 88 پیسے کا اضافہ ہوا۔ اسی عرصے میں ٹماٹر کی فی کلو قیمت میں 11 روپے 5 پیسے، لہسن کی فی کلو قیمت میں 6 روپے تک کا اضافہ ہوا۔

دال مسور کی قیمت میں 13 روپے فی کلو، دال ماش  کی قیمت میں 11 روپے فی کلو اضافہ ہوا جبکہ  برانڈڈ گھی کا ڈھائی کلو کا ڈبہ 25.27  روپے مہنگا ہوا۔

بیف کی فی کلو قیمت میں  بھی 7 روپے تک کا اضافہ ہوا ۔ایل پی جی  کے گھریلو سیلنڈر کی قیمت میں 177 روپے سے زائد کا اضافہ ہوا جبکہ  پیاز، مرغی، آٹا اور انڈے  کی قیمت میں کمی واقع ہوئی۔

 ایک ہفتے میں مجموعی طور پر 7 اشیاء کی قیمتوں میں کمی ہوئی جبکہ 14 اشیاء کی قیمتوں میں استحکام رہا۔