خیبر پختونخوا میں 18 جولائی سے پیٹرول پمپس کو بند کرنے کا اعلان کیا گیا ہے، آل پاکستان پیٹرولیم ایسوسی ایشن کے صوبائی صدر عبدالماجد نے کہا ہے کہ ڈیلرز کا مارجن 6 فیصد کرنے تک ہڑتال جاری رہے گی۔

پیشاور میں آل پاکستان پٹرولیم ایسوسی ایشن کے صوبائی اور ضلعی عہدیداروں کا اجلاس ہوا۔ جس کے بعد صوبائی چیئرمین عبدالماجد نے پریس کانفرنس میں کہا کہ سابقہ حکومت نے ڈیلرز کے لیے فی لیٹر مارجن 6 فیصد کرنے کی یقین دہانی کرائی تھی، جون 2022 میں مارجن 3 فیصد سے 6 فیصد ہونا تھا تاہم ایسا نہ ہو سکا۔

یہ بھی پڑھیں: جولائی کی ہڑتال کسی صورت مؤخر نہیں کریں گے، پیٹرولیم ڈیلرز

عبدالماجد کے مطابق کم مارجن میں کاروبار کرنا مشکل ہو گیا ہے، مجبورا 18 جولائی سے ہڑتال کی کال دی ہے، خیبر پختونخوا کے تمام ریجنز کے ڈیلرز نے ہڑتال کے فیصلے کی توثیق کی ہے۔

جنرل سیکرٹری سرحد پیٹرولیم ایسوسی ایشن گل نواز آفریدی نے کہا کہ پیٹرول پمپس کو بدنام کرنے کے لیے غلط طریقے سے گیج چیک کیے جا رہے ہیں، کم گیج والے پیٹرول پمپس کا ساتھ نہیں دیں گے لیکن جن پیٹرول پمپس پر غلط جرمانے لگائے گئے ان کا دفاع کریں گے۔

گل نواز آفریدی نے کہا کہ خیبرپختونخوا میں 2500 پیٹرول پمپس ہیں، سب 18 جولائی کو ہڑتال کریں گے۔