کراچی: انٹر بینک میں ڈالر 3 روپے 8 پیسے مہنگا ہوکر 236 روپے تک پہنچ گیا ہے۔

گزشتہ کئی روز سے انٹربینک میں روپے کی ریکارڈ کمی کا سلسلہ مسلسل جاری ہے اور ایسے میں امریکی ڈالر آئے روز نئی بلندیوں کو چھو رہا ہے۔

کاروباری ہفتے کے تیسرے روز بھی ڈالر کی اونچی اڑان جاری ہے اور کاروبار کے آغاز میں ہی ڈالر کی قدر میں اضافہ ریکارڈ کیا گیا ہے۔

اب تک انٹر بینک میں ڈالر کی قیمت میں 3 روپے 8 پیسے تک اضافہ ریکارڈ کیا گیا جس کے بعد امریکی ڈالر ملکی تاریخ کی بلند ترین سطح پر پہنچ گیا ہے۔

انٹر بینک میں ایک امریکی ڈالر کی قیمت 236 روپے تک جاپہنچی ہے جبکہ اوپن مارکیٹ میں ڈالر 237 روپے سے بڑھ کر 238 روپے میں فروخت ہورہا ہے۔

واضح رہے کہ ڈالر کی اونچی اڑان، ڈیزل اور پٹرول کی بڑھتی قیمتوں کے باعث اشیائے خورونوش کی بھی قیمتیں عوام کی قوت خرید سے باہر ہوگئی ہیں۔