وفاقی کابینہ نے ٹماٹر اور پیاز کی درآمد پر ٹیکس چھوٹ کی منظوری  دے دی۔

فیڈرل بورڈ آف ریونیو (ایف بی آر) ذرائع کا کہنا ہے کہ  وفاقی کا بینہ سے ایف بی آر کی سمری کی سرکولیشن کے ذریعے منظوری لے لی گئی ۔

ایف بی آر ذرائع کا کہنا ہے کہ وفاقی کابینہ نے ٹماٹر اور پیاز کی درآمد پر سیلز ٹیکس اور ود ہولڈنگ ٹیکس چھوٹ کی منظوری دے دی ہے۔

ذرائع کا مزید کہنا ہے کہ  پیاز اور ٹماٹر کی درآمد پر ٹیکس چھوٹ 31 دسمبر 2022 تک دی گئی ہے۔

واضح رہے کہ ملک میں سیلابی صورتحال کے باعث فصلوں کو شدید نقصان پہنچا ہے جس کی وجہ سے سبزیوں کی قیمتیں آسمان سے باتیں کرنے لگی ہیں اور ملک میں غذائی بحران کا خدشہ پیدا ہوگیا ہے۔

اس صورتحال کو مد نظر رکھتے ہوئے حکومت نے پیاز اور ٹماٹر کی درآمد کا فیصلہ کیا تھا۔