لاہور میں ٹرانسپورٹرز کی ہڑتال دوسرے روز میں داخل ہو گئی، ٹرانسپورٹرز نے آج دو بجے کے بعد موٹر ویز اور قومی شاہراہیں بند کرنے کا فیصلہ کیا ہے۔

تفصیلات کے مطابق گزشتہ روز لاہور سمیت پنجاب کی کئی اضلاع میں ٹرانسپوٹرز نے ہڑتال شروع کی ہے جو کہ آج دوسرے روز میں داخل ہوگئی جس کے باعث آج بھی شہر کے زیادہ تر اڈے بند ہیں۔

ترجمان پبلک ٹرانسپورٹرز ایکشن کمیٹی حافظ جہانگیر نے کہا کہ  کسی حکومتی نمائندے نے رابطہ نہیں کیا، اس لیے ہم نے آج دو بجے کے بعد موٹر ویز اور قومی شاہراہیں بند کرنے کا فیصلہ کیا ہے۔

ترجمان ٹرانسپوٹرز کا کہنا تھا کہ ہمارے مطالبات جائز ہیں، جب تک مطالبات تسلیم نہ ہوتے ہڑتال کا فیصلہ واپس نہیں لیں گے، گاڑیاں سڑکوں پر کھڑی کر کے ٹریفک کی روانی بند کردیں گے۔

واضح رہے کہ ٹرانسپوٹرز نے انکم ٹیکس ، ٹوکن ٹیکس ، ٹول ٹیکس سمیت دیگر ٹیکسز میں اضافے کے خلاف ہڑتال کی ہے۔

اس حوالے سے پبلک ٹرانسپوٹرز کا کہنا ہے کہ حکومت کی جانب سے ایک سیٹ میں تین سو روپے سے بڑھا کر چار ہزار اور آٹھ ہزار روپے ٹیکس عائد کر دیا گیا۔

ٹرانسپوٹرز نے مطالبی کیا ہے کہ پبلک ٹرانسپورٹ کو انڈسٹری کا درجہ دیا جائے، پنجاب میں ڈرائیونگ لائسنس کے حصول کو آسان بنایا جائے، پنجاب میں روٹ کے نظام کو دیگر صوبوں کی طرح رائج کیا جائے۔