چین نے پاکستان سے گدھے اور کتے درآمد کرنے کی خواہش کا اظہار کیا ہے۔

خبر رساں ادارے کے مطابق سینیٹ کی قائمہ کمیٹی برائے تجارت نے انکشاف کیا ہے کہ چین پاکستان سے گدھے اور کتے درآمد کرنے کا خواہاں ہے۔

سینیٹ کی قائمہ کمیٹی برائے کامرس کا اجلاس سینیٹر ذیشان خانزادہ کی زیر صدارت منعقد ہوا جس میں وزارت تجارت کے حکام نے برآمدات اور درآمدات کے حوالے سے بریفنگ دی۔

بریفنگ کے دوران وزارت تجارت کے حکام نے بتایا کہ چین پاکستان سے گدھے درآمد کرنا چاہتا ہے جب کہ چین گوشت برآمد کرنے کی ایک بڑی مارکیٹ ہے۔

رپورٹ کے مطابق اجلاس کے دوران کمیٹی کے رکن دنیش کمار نے بتایا کہ چین پاکستان سے گدھے اور کتے برآمد کرنا چاہتا ہے۔

اجلاس کے دوران رکن کمیٹی مرزا محمد آفریدی نے کمیٹی کو مشورہ دیا کہ افغانستان میں جانور سستے ہیں کیونکہ وہاں خریدار موجود نہیں لہذا افغانستان سے جانور درآمد کرکے گوشت برآمد کیا جاسکتا ہے۔