ڈالر کی اونچی اڑان جاری ہے جب کہ ڈالر کے مقابلے میں بھارتی روپیہ تاریخ کی کم ترین سطح پر پہنچ گیا ہے۔

غیر ملکی خبر رساں ادارے کے مطابق بھارت میں ایک ڈالر 83 روپیہ کا ہوگیا ہے جو کم ترین سطح ہے جب کہ آج دن کے آغاز پر بھارتی روپیہ 82.30 روپے پر کھلا تھا۔

رپورٹ کے مطابق بھارتی روپیہ کی مسلسل تنزلی کے باعث ریزو بینک آف انڈیا نے ڈالر خریدیں ہیں تاکہ بھارتی روپیہ مستحکم ہوسکے۔

واضح رہے کہ ڈالر مہنگا ہونے سے بھارت میں مہنگائی کا سونامی آئے گا جب کہ اشیائے ضروریہ پہلے ہی غریب عوام کی دسترس سے باہر ہیں۔

غیر ملکی خبر رساں ادارے سے گفتگو کرتے ہوئے ایک بھارتی تاجر کا کہنا تھا کہ دو پبلک سیکٹرز انٹر پرائزز نے تیل کی برآمدات کے لیے بڑی تعداد میں ڈالر مانگے ہیں جس کی وجہ سے روپے کی قدر میں کمی واقع ہوئی ہے۔

یاد رہے کہ کورونا وبا کے آغاز سے ہی بھارتی معیشت مسلسل گراوٹ کا شکار ہے جب کہ عالمی منڈی میں تیل کی قیمتوں میں اضافے کے بعد بھارت میں ڈالر کے ذخائر میں کمی واقع ہوئی ہے۔