کراچی: ملک کے مختلف شہروں میں ہونے والی بدترین لوڈ شیڈنگ نے شہریوں کی زندگی اجیرن کردی ہے، سخت گرمی و حبس کے باعث ان کا براحال ہو گیا ہے۔

تفصیلات کے مطابق کراچی میں سورج آج کل آگ برسا رہا ہے اور شہر قائد میں لوڈ شیڈنگ نے گرمی کے ستائے عوام پر دوہرا عذاب ڈھا رکھا ہے۔

کراچی کے مختلف علاقوں میں 10 سے 16 گھنٹے کی لوڈ شیڈنگ کی جارہی ہے جبکہ مستثنیٰ علاقوں میں لوڈ شیڈنگ معمول بن گئی ہے۔

کراچی کے علاقے سرجانی، اولڈ سٹی ایریا، گارڈن، لسبیلہ، سول لائنز، لانڈھی، اورنگی، کورنگی، ملیر اور گلستان جوہر سمیت مختلف علاقوں میں بجلی کی فراہمی معطل ہے۔

اس کے علاوہ صدر، لیاری اور کیماڑی کے مکین بھی طویل لوڈ شیڈنگ سے پریشان ہیں۔

شہریوں کا کہنا ہے کہ مرمت اور فالٹس کی درستگی کے نام پر بھی بجلی بند رکھی جا رہی ہے۔

پشاور اور گردونواح

پشاور اور گرد ونواح میں بھی بجلی کی لوڈشیڈنگ کا سلسلہ جاری ہے جس کے باعث شہریوں کو شدید پریشانی کا سامنا کرنا پڑرہا ہے۔

پشاور کے شہری علاقوں میں 8 سے 10 گھنٹے کی لوڈشیڈنگ کی جا رہی ہے جبکہ دیہاتی علاقوں میں 14 سے 16 گھنٹے کی لوڈشیڈنگ ہو رہی ہے اور دور افتادہ اور مضافاتی علاقوں میں 18 گھنٹے کی لوڈشیڈنگ جاری ہے۔

سکھر

شدید گرمی میں سکھر کے مختلف علاقوں میں بجلی کی لوڈشیڈنگ کا سلسلہ جاری ہے، شیڈول لوڈشیڈنگ کے ساتھ ساتھ بلاجواز بجلی بند کی جاری ہے۔

سکھر میں رائل روڈ، قریشی روڈ، بھوسہ لین، نیوپنڈ، تھرمل کالونی سمیت دیگر علاقوں میں بجلی کی لوڈشیڈنگ کا عذاب زیادہ ہے، ان علاقوں میں 24 گھنٹوں کے دوران 8 گھنٹے کی لوڈشیڈنگ جاری ہے۔

کوئٹہ

کوئٹہ میں بھی بجلی لوڈ شیڈنگ اور بجلی کی آنکھ مچولی نے شہریوں کو اذیت میں مبتلا کردیا ہے۔

شہر میں غیر اعلانیہ لوڈشیدنگ کا دورانیہ 6 سے 8 گھنٹے تک ہوگیا جبکہ نواحی علاقوں میں 10 سے 12 گھنٹے غیر اعلانیہ لوڈشیدنگ کی جا رہی ہے۔

گاؤں دیہات میں 16 سے 18 گھنٹے بجلی کی لوڈ شیڈنگ جاری ہے، تاہم بجلی نہ ہونے سے گھریلو صارفین اور کاروباری حضرات کو مشکلات کا سامنا ہے۔

واضح رہے کہ ملک بھر میں شدید گرمی میں بجلی کی لوڈ شیڈنگ کا سلسلہ باقاعدگی سے جاری ہے جس کی وجہ سے شہریوں کی زندگی اجیرن بن گئی ہے۔