کراچی: کے الیکٹرک کے انتظامی معاملات سنبھالنے کی جنگ میں ملکیت کے نئے دعویدار اور موجودہ کمپنی مالک کے درمیان مینجمنٹ کو کنٹرول کے لیے اختلافات شدت اختیار کرگئے ہیں۔

تفصیلات کے مطابق عدالتی جنگ سندھ ہائی کورٹ، کیمن آئی لینڈ سے نکل کر برطانیہ تک پہنچنے کے امکانات ہیں۔ چیف انویسٹمنٹ آفیسر الجماععہ کا کہنا ہے کہ شہریار چشتی کے الیکٹرک کا انتظام نہیں سنبھال سکتے۔

آئی جی سی ایف گروپ کا شیئر نئے مالک کو منتقل ہونے کے بعد ایک نیا تنازع پیدا ہوگیا ہے۔

کراچی میں میڈیا سے بات کرتے ہوئے چیف انویسٹمنٹ آفیسر الجماععہ شان اشعری نے کہا کہ ایشیا پاک کی جانب سے ملکیت کے دعوے کا معاملہ زیر سماعت ہے۔

انہوں نے کہا کہ وہ قانونی چارہ جوئی کا حق رکھتے ہیں، ابراج کے ساتھ ہوا معاہدہ ہماری اجازت کے بغیر نئے فریق کو منتقل کرنا غلط ہے۔ نیا سرمایہ کار بڑے شیئر ہولڈر کا دعویٰ ثابت کرے۔

شان اشعری کے مطابق الجماعہ آئندہ سات سال کے دوران کراچی کے لیے سستی بجلی تیار کرنے کا منصوبہ نیپرا میں جمع کرا چکے ہیں جس میں 500 ارب روپے کی سرمایہ کاری بھی شامل ہے۔  شنگھائی الیکڑک کی ڈیل بھی کراچی کے مفاد میں ہے۔

واضح رہے کہ کے الیکٹرک کے بورڈ آف ڈائریکٹرز میں پچھلے دس ماہ کے دوران کوئی نیا ڈائریکٹر تعینات نہیں ہوا ہے۔