اسلام آباد: مالی سال 2023-24 کے دوران پن بجلی کی پیداوار میں اضافہ ہوگیا ہے۔

واٹر اینڈ پاور ڈیویلپمنٹ اتھارٹی (واپڈا) کی جانب سے جاری رپورٹ میں بتایا گیا ہے کہ پہلی سہ ماہی میں واپڈا پن بجلی گھروں نے نیشنل گرڈ کو 15ارب 2لاکھ  یونٹ بجلی مہیا کی جبکہ پن بجلی کی یہ پیداوار گزشتہ سال کی نسبت ایک ارب 78 کروڑ 80لاکھ یونٹ زیادہ ہے۔

رپورٹ کے مطابق واپڈا پن بجلی کی اوسط پیداواری لاگت 3 روپے 51پیسے فی یونٹ ہے، تاہم بجلی کی اضافی پیداوار سے قومی خزانہ کو تقریباً 50 ارب روپے کی بچت ہوئی۔

رپورٹ میں بتایا گیا ہے کہ واپڈا کی پن بجلی پیدا کرنے کی مجموعی صلاحیت تقریباً 9 ہزار 500 میگاواٹ ہے، جبکہ واپڈا پن بجلی پاکستان میں سستی ترین اور ماحول دوست بجلی ہے۔

پاور ڈیویلپمنٹ اتھارٹی نے بتایا کہ واپڈا نیشنل گرڈ میں پن بجلی کی تناسب بڑھانے کے لئے متعدد منصوبے تعمیر کر رہا ہے، جس میں دیا مر بھاشا ڈیم، مہمند ڈیم، داسو اور تربیلا پانچواں توسیعی منصوبہ شامل ہے۔

واپڈا نے مزید کہا کہ زیر تعمیر منصوبوں کی 2029 تک مرحلہ وار تکمیل سے 10 ہزار میگاواٹ مزید پن بجلی حاصل ہوگی اور منصوبے مکمل ہونے پر سستی پن بجلی کی موجودہ صلاحیت دو گنا ہوجائے گی۔

18 جولائی 2023 کو دریاؤں اور آبی ذخائر میں پانی کی صورتِ حال بہتر ہونے پر پن بجلی کی پیداوار میں بھی اضافہ ہوا تھا۔

آبی ذخائر کی سطح مزید بلند ہونے اور منگلا سے ارسا کا انڈنٹ بڑھنے سے پیداوار میں اضافہ ہوا جبکہ نیلم جہلم پروجیکٹ کی بحالی کے بعد پن بجلی کی پیداوار میں اضافہ بھی ہو جائے گا۔