اسلام آباد: نگران حکومت نے امپورٹ کی آڑ میں انڈرانوائسنگ اور اوورانوائسنگ روکنے کیلئے مختلف ممالک سے معاہدے کرنے کا فیصلہ کرلیا ہے۔

ذرائع نے بتایا ہے کہ انڈر انوائسنگ اور اوور انوائسنگ روکنے کیلئے فیڈرل بورڈ آف ریونیو (ایف بی آر) کو نئے اہداف دے دیے گئے۔

ذرائع کے مطابق یو اے ای، سنگاپور، ہانگ کانگ اور افغانستان کے ساتھ الیکٹرانک ڈیٹا انٹرچینج کے معاہدے کرنے کا فیصلہ کیا گیا ہے، تاہم پاکستان کے اہم درآمدی پارٹنرز کے ساتھ الیکٹرانک ڈیٹا انٹرچینج قائم کیا جائے گا۔

اس کے علاوہ ایف بی آر نے الیکٹرانک ڈیٹا انٹرچینج کیلئے مفاہمت کی یادداشت کا مسودہ تیار کر لیا ہے۔

ذرائع کا مزید کہنا تھا کہ وزارت خارجہ کے ذریعے چاروں ممالک کو مسودے بھجوائے جائیں گے، حکومت کی کوشش ہے کہ مفاہمت کی یادداشتوں پر جلد دستخط ہو جائیں، مفاہمت سے درآمدات میں انڈر اور اوور انوائسنگ روکنے میں مدد ملے گی۔

واضح رہے کہ پاکستان اس سے قبل چین کے ساتھ الیکٹرانک ڈیٹا انٹرچینچ معاہدہ کر چکا ہے۔