اسلام آباد: مہنگائی کے ستائے شہریوں کیلئے اچھی خبر آگئی ہے، رمضان سے قبل یوٹیلیٹی اسٹورز پر صارفین کیلئے ریلیف کا اعلان کردیا ہے۔

یوٹیلیٹی اسٹورز کی جانب سے مختلف برانڈز کے گھی، کوکنگ آئل، چائے اور دیگراشیاء کی قیمتوں میں کمی کا اعلان کیا گیا ہے۔

مختلف برانڈز کے گھی اور کوکنگ آئل کی قیمتوں میں 4 سے 100 روپے تک کی کمی کردی گئی جبکہ برانڈڈ چائے کی قیمتوں میں بھی 100 روپے پیک تک کی کمی کر دی گئی۔

اس کے علاوہ اسٹورز پر ڈالڈا کوکنگ آئل 523 سے کم ہو کر 508 روپے میں دستیاب ہوگا جبکہ مختلف برانڈز کے سوپ بھی 15 سے 40 روپے تک سستے کر دیے گئے۔

یوٹیلیٹی اسٹورز کی جانب سے اشیاء کی قیمتوں پر کمی کا نوٹیفکیشن جاری کردیا گیا ہے تاہم قیمتوں میں کمی کا اطلاق فوری طور پر نافذ العمل ہوگا۔

کارپوریشن کا کہنا ہے کہ یوٹیلیٹی اسٹورز پر آئندہ ماہ سے رمضان ریلیف پیکج کا بھی آغاز ہوگا، اسٹورز پر رمضان ریلیف پیکج کے تحت تقریباً 20 اشیاء پر ریلیف ملے گا۔

واضح رہے کہ رواں سال رمضان پیکیج 7 ارب 49 کروڑ سے زائد کا دیا جائے گا جس کے تحت یوٹیلیٹی اسٹورز پر 19 بنیادی اشیاء پر ریلیف ملے گا، اس پیکج کا اطلاق 4 مارچ سے کرنے کی تجویز ہے۔

  پیکیج کے تحت آٹا، چینی، گھی، کوکنگ آئل، چاول، دالوں پر سبسڈی دی جائے گی، کھجور، بیسن، دودھ، مشروبات اور مصالحہ جات پر بھی رعایت دی جائے گی۔

بی آئی ایس پی مستحقین کو رمضان پیکج کے تحت ٹارگٹڈ سبسڈی ملے گی، ٹارگٹڈ سبسڈی کے سوا عام صارفین کیلئے بھی خصوصی رعایتی قیمت مقرر ہو گی۔